Azərbaycanda valideyn məsuliyyətinin artırılması üçün qanunvericliyə dəyişikliklər edilib, amma bu məsələ ilə bağlı qanunvericliyə yenə də dəyişikliklər edilməlidir. Trend-in məlumatına görə, bunu Ailə, Qadın və Uşaq Problemləri üzrə Dövlət Komitəsinin sədri Hicran Hüseynova bu gün "Uşaq hüquqları: bərabər hüquq və imkanlarımız" mövzusunda keçirilən tədbirdə bildirib.
Erkən nikahlarla bağlı məsələyə toxunan komitə sədrinin sözlərinə görə, qızını məcburən ərə verən atanın bu addımı artıq cinayət sayılmalıdır:
"Bir ata qızını ərə verməyə məcbur edirsə, o, artıq cinayətə yol verir. O, bir tərəfdən qanunvericiliyi, digər tərəfdən qızının hüquqlarını pozur. Bəzi valideynlər elə fikirləşirlər ki, uşaq onlarındırsa, kimə istəsələr, ərə verə bilərlər. Bu, tamamilə yanlış düşüncədir. Böyüklərin əsas məqsədi o olmalıdır ki, uşaqlarını sağlam mühitdə böyütsünlər. Onlar sağlam düşüncəli insan kimi formalaşdıqda ailə qurmalıdırlar".
H.Hüseynova ölkədə bəzi problemli ailələrin olduğunu da deyib. Onun sözlərinə görə, valideyn-uşaqlar arasında olan münasibətlər bir çox hallarda düzgün qurulmur, onlar bir-birlərini başa düşmürlər. Nəticədə isə elə vəziyyət yaranır ki, uşaq sanki qapalı bir mühitdə yaşayır.
H.Hüseynova deyib ki, Azərbaycanda bəzi insanlar qızların erkən yaşda ərə getməsini dinlə əlaqələndirirlər, amma islam dinində - "Qurani Kərim"də belə məsələlər yoxdur. H.Hüseynova deyib ki, əslində, bunlar hamısı insanların yaratdığı stereotiplərdir və onların əsasında doğru olmayan ailə modeli formalaşdırırlar: "Deyirlər ki, guya dində belədir. Əslində isə "Quran"da qadınların da hüquqları qorunur. Əgər insanlar bunları qəbul etsəydi, cəmiyyət başqa cür olardı".
Problemlərin çoxunun dini kəbinlə bağlanan nikahlardan qaynaqlandığını deyən H.Hüseynova bildirib ki, bəzən atalar qızlarının ailə həyatı dağıldıqdan sonra komitəyə hüquqlarının qorunması üçün müraciət edirlər: "Amma müraciət araşdırılarkən məlum olur ki, həmin qızların nikahı rəsmi dövlət qeydiyyatına alınmayıb. Buna görə də onlar öz hüquqlarını yetərincə qoruya bilmirlər".
H.Hüseynova Azərbaycanda qeydə alınan boşanmaların səbəblərindən də danışıb (APA). H.Hüseynova bildirib ki, bunun bir çox səbəbi var. Ən vacib problemin qızların ailə qurmağa fiziki, psixoloji cəhətdən hazır olmadığını deyən komitə sədrinin fikrincə, bunların nəticəsində problemlər yaranır. Onun sözlərinə görə, son dövrlər bölgələrdə qadınların sahibkarlıq fəaliyyətinin təşviqi istiqamətində tədbirlər görülür: “Müşahidələr göstərir ki, qadının iqtisadi baxımdan müstəqil və güclü olduğu ailələrdə normal mühit yaranır. Həmin qadın maddi cəhətdən ailəsinə kömək edə bilir. Belə ailələrdə sağlam düşüncəli uşaqlar böyüyürlər. Təhsilli qadın hər zaman çalışacaq ki, uşaqları təhsil alsın, irəli getsin. Təəssüf ki, bu gün cəmiyyətimizdə problemli ailələr də var, məqsədimiz onlarla işləməkdir”.
