Fatimə Hacıbəyli: "Bu gün azyaşlı övladının ehtiyacını qarşılamaq üçün evdə otura bilməyib işləməyə məcbur olan valideynlər yetərincədir"
Azərbaycanda 3 yaşınadək uşağını təkbaşına böyüdən valideynlər üçün qısaldılmış iş vaxtı tətbiq ediləcək.
Belə bir təklif Milli Məclisin Hüquq siyasəti və dövlət quruculuğu komitəsinin son keçirilən iclasında müzakirəyə çıxarılan "Dövlət qulluqçularının ayrı-ayrı kateqoriyaları üçün qısaldılmış iş vaxtı haqqında" Qanuna dəyişiklik edilməsi barədə yeni layihədə öz əksini tapıb.
Qanunun hazırkı variantına görə, dövlət qulluğunda olan I və II qrup əlillərə, sağlamlıq imkanları məhdud 18 yaşınadək şəxslərə, hamilə və yaşyarımadək uşağı olan qadınlara və yaşyarımadək uşaqlarını qanunvericiliklə müəyyən edilmiş səbəblərdən təkbaşına böyüdən atalara, habelə uşaqların qəyyumlarına, himayədarlarına həftədə 36 saat iş vaxtı müəyyən edilir.
Yeni layihədə isə təklif edilir ki, yaşyarımadək uşaqlarını qanunvericiliklə müəyyən edilmiş səbəblərdən təkbaşına böyüdən atalar üçün nəzərdə tutulan güzəşt bundan sonra 3 yaşınadək uşağını təkbaşına böyüdən valideynlərə aid edilsin.
Qeyd edək ki, layihə Milli Məclisin plenar iclasına tövsiyə olunub.
3 yaşınadək uşağını təkbaşına böyüdən valideynlərin iş vaxtının qısaldılması ictimaiyyət tərəfindən müsbət qarşılanır.
"Vəfa" Sosial İctimai Birliyinin rəhbəri Fatimə Hacıbəyli "Bakı-Xəbər"ə açıqlamasında qeyd etdi ki, övladını tək böyüdən analara dövlət tərəfindən dəstək göstərilməlidir. Dəstək müxtəlif xarekterli olmalıdır: "Bu gün azyaşlı övladının ehtiyacını qarşılamaq üçün evdə otura bilməyib işləməyə məcbur olan valideynlər yetərincədir. Həmin valideynlərə köməklik göstərmək məqsədilə iş saatının azaldılması təklifi reallaşarsa, valideynlər bundan razı qalar. Bəllidir ki, bu gün azyaşlı uşaqlar bağçalara götürülmür. Çarəsiz qalan valideyn məcbur olub uşağını ödənişli bağçaya qoyur. Ancaq elə ailələr var ki, onların maddi durumu imkan vermir ki, övladını ödənişli bağçaya qoysun".
Həmsöhbətimizin sözlərinə görə, bu gün ölkədə tənha anaların sayı yetərincədir: "Kimisi uşağını qeyri-rəsmi nikahdan doğduğu, kimisi boşandığı, kimisi də ailə başçısını erkən itirdiyi üçün övladı ilə başbaşa qalır, həm maddi, həm də mənəvi çətinliklərini tək daşımalı olur. Beynəlxalq sənədlərdə himayəsində azyaşlı uşağı və ya uşaqları olan, dul qalmış, boşanmış və ya ailə qurmamış qadına tənha, tək ana deyilir. Bu tip ailələr "təkvalideynli ailələr" də adlanır. Təkvalideynli ailələrə dövlət tərəfindən dəstək göstərilməlidir. O valideynlərə, xüsusilə də himayəsində azyaşlı övladı olan valideynlərə övladının normal təlim-tərbiyəsi ilə məşğul olmaq üçün dövlət tərəfindən həm maddi, həm də mənəvi dəstək göstərilməlidir. ".
Günel CƏLİLOVA
