Kənan Qubadzadə: "Müstəqil ölkənin gənc vətəndaşı olaraq psixotrop maddədən istifadə və gecə klublarına daxilolmanın qarşısının alınması məqsədilə bu məsələnin qanun şəklində həll olunmasını dəstəkləyirəm"
Milli Məclisin Gənclər və idman komitəsinin ötən iclasında "Gənclər siyasəti haqqında" Qanuna təklif edilən dəyişikliklər və əlavələr müzakirə olunub. Layihədə həmçinin 18 yaşı tamam olmayan gənclərin mənəvi-əxlaqi tərbiyəsinin təmin edilməsi, sağlam gəncliyin formalaşdırılması məqsədilə bir sıra qadağanedici müddəalar da nəzərdə tutulur.
Belə ki, Azərbaycanda 18 yaşı tamam olmayan gənclərə tütün məmulatlarının, spirtli içkilərin satışı və bu məhsullardan istifadə, eləcə də şans və mərc oyunlarında birbaşa və dolayı yolla iştirakı, himayəsində olduğu şəxslərdən ən azı birinin iştirakı olmadan saat 20:00-dan sonra bar, diskoteka və gecə klublarında iştirakı qadağan edilir.
Yetkinlik yaşına çatmayan gənclərin gecə klublarında iştirakının qadağan olunması ölkə ictimaiyyəti tərəfindən təqdir olunur.
Gənclər Mərkəzi İctimai Birliyinin rəhbəri Kənan Qubadzadə "Bakı-Xəbər"ə açıqlamasında qeyd etdi ki, "Gənclər siyasəti haqqında" Qanuna edilən dəyişikliklər təqdirəlayiqdir: "Müstəqil ölkənin gəncləri olsaq da, bəzi məsələlərdə ölkə qanunvericiliyinə uyğun formada hərəkət etməliyik. Bəllidir ki, gənclərin bir qismi öz yaşına uyğun olmayan işlərə qoşulur. Məsələn, tütün məmulatlarından istifadə, bar və ya gecə klublarına daxilolma kimi xoşagəlməz hərəkətlər müşahidə olunur. Müstəqil ölkənin gənc vətəndaşı olaraq psixotrop maddədən istifadə və gecə klublarına daxilolmanın qarşısının alınması məqsədilə bu məsələnin qanun şəklində həll olunmasını dəstəkləyirəm. Nəzərə almaq lazımdır ki, 18 yaşına çatmayan şəxslər etdiyi hərəkətin nə anlam daşıdığının tam fərqində olmur. Onlar tam olaraq həyatı dərk etmir. O gənclər əyləncə mərkəzlərinə getmək istəyirsə, valideynləri ilə birgə yollansın".
Həmsöhbətimizin sözlərinə görə, gənclərə dövlət tərəfindən böyük qayğı və dəstək göstərilir: "Xatırladım ki, 1994-cü ildə Gənclər və İdman Nazirliyi yaradılıb, 2011-ci ildə Prezident yanında Gənclər Fondunun və ötən il Milli Məclisdə Gənclər və idman komitəsinin yaradılması gənclərə dəstəyin bariz nümunəsidir. Sağlam düşüncəli gənclərin yetişməsi üçün saysız layihələr icra olunur. Gənclər dövlətin onlar üçün yaratdığı şəraitdən istifadə edib öz sağlam gələcəyi üçün işlər görməlidir".
Günel CƏLİLOVA
