Adil Qeybulla: "İnsanlar bilməlidir ki, onlar şəkər xəstəliyini bilə-bilə gizlədib və heç bir müalicə almırsa, intihar yolunu seçirlər"
"Hazırda Azərbaycanda qeydiyyatda olan şəkərli diabet xəstələrinin sayı 220 mindən çoxdur. Lakin bu gün də xəstəliyini gizlədən insanlar var. Bu da gələcəkdə xəstələrin sayında artıma öz təsirini göstərəcək".
Bunu jurnalistlərə Azərbaycanın baş endokrinoloqu Rafik Məmmədhəsənov deyib. Onun sözlərinə görə, şəkərli diabetlə bağlı dövlət proqramı hazırlananda ölkədə 56 min xəstə olsa da, proqram qəbul olunduqdan sonra xəstələrin sayı durmadan artıb.
Şəkərli diabetdən əziyyət çəkən insanların öz xəstəliyini nə səbəbdən gizlətməsi barədə fikir bildirən professor, tibbi ekspert Adil Qeybulla "Bakı-Xəbər"ə açıqlamasında qeyd etdi ki, bu, insanların kompleksli olması ilə bağlıdır: "Təəssüf ki, bəzi insanlar xəstəliyi şəxsiyyət göstəricisi sanır. Onlar sağlam görünməklə xəstəliyini gizlətmək istəyir. Xəstəliyə məhəl qoymayıb ətrafa özünü sağlam tanıtmaq istəyən insanlar yetərincədir. Bu şəxslər elə bilir ki, yaxınları, dostları onun şəkər xəstəliyi daşıyıcısı olduğunu bilsə, onun nüfuzu zədələnəcək".
Həmsöhbətimiz onu da əlavə etdi ki, şəkər xəstəliyindən əziyyət çəkənlərin bunu gizlətməsinin digər səbəbi isə onların nəfsi ilə bağlıdır: "Bəllidir ki, şəkər xəstəliyindən əziyyət çəkənlər daha sağlam və uzun ömür yaşaması üçün qidasına xüsusi fikir verməlidir. Ancaq elə insanlar var ki, onlar nəfsinə hakim ola bilmir. Bu səbəbdən də daşıdığı xəstəliyi ətrafından gizlədir".
Professorun sözlərinə görə, ölkədə sanitariya və sağlamlığa diqqətlə bağlı maarifləndirmənin aşağı səviyyədə olması
insanların düşüncəsinə təsir edir: "İnsanlar bilməlidir ki, onlar şəkər xəstəliyini bilə-bilə gizlədib və heç bir müalicə almırsa, intihar yolunu seçirlər".
A.Qeybullanın fikrincə, bəzi şəkər xəstələri öz xəstəliyindən xəbərsiz olur: "Onların xəbərsiz olmasının günahkarı isə yaxınlarıdır. Şəkərli diabet daşıyıcısının daim ətrafında olan şəxs onun davranışlarında dəyişikliklərin fərqində olmalı və dərhal həkimə müraciət etməlidir".
Günel CƏLİLOVA
