10-11 noyabr 2016-cı il tarixdə "Polisə Dəstək" İB Astara şəhərinin "Kitab Evi"ndə Azərbaycan Respublikası Prezidentinin yanında QHT-lərə Dövlət Dəstəyi Şurasının maliyyə dəstəyi ilə "Soyqırım, Dini Radikalizm və Terrorizm təzahürlərinə qarşı təşəbbüslər" mövzusunda Lerik və Astara rayon polis şöbələrinin müvafiq sahə üzrə əməkdaşlarının, ictimai şuraların, RİH aparatının məsul işçilərinin, rayon idman və gənclər şöbəsinin, Dini Qurumlarla İş üzrə Komitənin rayon üzrə şöbəsinin əməkdaşlarının, Astara rayon pedaqoji kollecinin tələbələrinin, ilahiyyatçıların, habelə ictimai polisin nümayəndələrinin iştirakı ilə geniş seminar-mühazirə keçirib.
Tədbirdə "Polisə Dəstək" İctimai Birliyinin sədri Şəmsəddin Əliyev layihə ətrafında geniş məlumat verib. O, Azərbaycan Respublikasında vətəndaşlar arasında dini radikalizm hallarının qarşısını almaq, vahimə yaradan terrorçuluq əməllərini öncədən zərərsizləşdirmək və ölkə daxilində sabitliyin pozulmasına yönələn təhlükəli əməlləri əngəlləmək üçün kifayət qədər hüquqi bazanın və onu nəzarət altına alan, ictimai münasibətlərə zidd halların qarşısını almağa çevik reaksiya verən dövlət orqanlarının olduğunu vurğulayıb. Gənclərin dini radikalizmə qarşı mübarizədəki rolunu önə çəkən Ş.Əliyev bildirib ki, ölkəmizdə mövcud ictimai-siyasi sabitliyin qorunmasında, dini radikalizmə qarşı mübarizədə dövlət orqanları ilə yanaşı vətəndaşlar, xüsusilə də gənclər fəal iştirak etməlidir. Sonra Astara RİH Aparatının Hüquq şöbəsinin müdiri Bəsti Əliyeva, Astara Rayon Gənclər və İdman İdarəsinin müdiri Ərçə Əliyev, DQİDK-nın Lənkəran bölgə şöbəsinin baş məsləhətçisi Hatəm Gülməmmədov, Qafqaz Müsəlmanları İdarəsinin Astara rayonu üzrə səlahiyyətli nümayəndəsi Hacı İlqar Həsənov çıxış edib. Gənclərin sualları mahiyyəti üzrə cavablandırılıb.
Dinlərin yaranma tarixi haqqında məlumat verən Qafqaz Müsəlmanları İdarəsinin Astara rayonu üzrə səlahiyyətli nümayəndəsi Hacı İlqar Həsənov ayrı-ayrı dövrlərdə müxtəlif maraqlar zəminində təriqətlərin yaranması və onların siyasiləşdirilməsi barədə iştirakçılara məlumat verib.
Astara rayon Gənclər və İdman İdarəsinin müdiri Ərçə Əliyev gənclərin dini radikalizmin sübyektlərinə çevrilməməsi üçün maarifləndirmə xarakterli tədbirlərin keçirilməsini məqsədəuyğun hesab edib.
Mövzu aktuallığı baxımından maraqla dinlənib.
Seminar-mühazirə 25-26 noyabr tarixlərində Lənkəran Dövlət Universitetində davam edəcək.
Məlumatı "Polisə Dəstək" İctimai Birliyinin mətbuat xidməti yayıb.
Xəbər xidməti
