Bəxtiyar Qəhrəmanov: "Mədə kiçiltmə zamanı xəstə artıq çəkisinin 40-75 faizini itirə bilər"
"Son illər mədə kiçiltmə əməliyyatlarının aparılması üçün müraciətlərin sayı artıb". Bunu akademik M.Mirqasımov adına Respublika Klinik Xəstəxanasının baş həkiminin cərrahiyyə işləri üzrə müavini Elmir Əsgərov jurnalistlərə bildirib.
E.Əsgərov deyib ki, mədə kiçiltmə əməliyyatının aparılması üçün Ümumdünya Səhiyyə Təşkilatının tövsiyə etdiyi tibbi göstərişlər var. Həkim bildirib ki, bu əməliyyatlar edilərkən xəstənin psixoloji durumu, başqa ağır xəstəliklərinin olub-olmaması da nəzərə alınır: "Əməliyyat bir həkim üçün ən son yol olmalıdır. Xəstənin çəki itirməklə bağlı problemi olarsa, onun üçün mədə kiçiltmə əməliyyatı uyğundursa, onda biz bu əməliyyatı edirik. Bu böyük bir əməliyyatdır. Bunun əməliyyatdan sonra yarana biləcək fəsadları var. Azərbaycanda mədə kiçiltmə əməliyyatları artıq uğurla icra olunur. Xəstələrin əməliyyatdan sonrakı çəki itkiləri çox qənaətbəxşdir".
Açıqlandığı kimi, son zamanlar mədə kiçiltmə əməliyyatı üçün müraciət edənlər çoxdur. Sosial şəbəkələrdə bu cür əməliyyatlardan sonra çəki atanların paylaşdığı şəkillər, məşhur simaların bu yolla arıqlaması digər kök insanları da bu üsulla artıq çəkidən qurtulmağa həvəsləndirir. Hətta bəzən çox çəkisi olmayanlar da kökəlməmək üçün bu cür əməliyyat etdirmək istədiyini deyir. Amma mədə bütün orqanizmi qida ilə təmin edən bir orqandır və həssas yanaşma tələb edir.
Mədə kiçiltmə ilə arıqlamaq mümkündür və bunun təcrübədən keçmiş nümunələri çoxdur. Bu əməliyyat üçün müraciət edənlər arasında azərbaycanlı məşhurlar da var. Belə ki, artıq çəkidən azad olmaq istəyənlər bu əməliyyat vasitəsilə istədiyi formaya düşüb.
Bariatrik cərrah Bəxtiyar Qəhrəmanov qəzetimizə açıqlamasında qeyd etdi ki, son bir il ərzində mədə kiçiltmə əməliyyatı üçün müraciət edənlər artıb: "Mədə kiçiltmə zamanı xəstə artıq çəkisinin 40-75 faizini itirə bilər. Orqanizmlər fərdi olduğu üçün, bu çəki itirmə də fərqli baş verə bilər. Statistik göstəricilərə əsasən deyə bilərəm ki, 8-12 faiz hallarda yenidən kökəlmə tendensiyası var. Amma əvvəlki çəkilərinə 1-2 faiz hallarda qayıda bilirlər. Tutaq ki, əməliyyatla 120 kilodan 65-ə düşüblər. 5 ildən sonra 70-75 kilo ola bilərlər. Mədə əzələli orqandır, qida qəbul etdikcə yenə böyüməsi mümkündür. Nəticədə müəyyən kökəlmə tendensiyaları ola bilər. Laparoskopik cərrahiyyə ümumilikdə 50 ildən çoxdur tətbiq olunur. Amma mədə kiçiltmə əməliyyatları müstəqil olaraq 2003-2004-cü illərdən tətbiq olunmağa başlayıb. Əvvəllər isə daha böyük əməliyyatın tərkib hissəsi idi. Bizim ölkəmizdə isə 2013-cü ildən tətbiq olunur".
Həmsöhbətimizin sözlərinə görə, mədə kiçiltmə əməliyyatı üçün müraciət edənlərin sayının artmasına səbəb adıçəkilən əməliyyatın uğurla baş verməsidir: "Əvvəllər xəstələr ehtiyat edirdi ki, birdən əməliyyat müsbət sonluqla başa çatmaz. Ancaq əməliyyatlar uğurlu olduğu üçün insanlar rahat şəkildə mədə kiçiltmə əməliyyatı üçün müraciət edir. Təbii ki, bunun da səbəbi tibbin inkişafı ilə bağlıdır".
Cərrahın sözlərinə görə, xəstə əməliyyatdan sonra qidaya münasibətini dəyişməlidir. Sağlam həyat tərzi keçirsə, bu daha yaxşıdır: "Çünki əməliyyat onun arıqlamasına səbəb ola bilər. Amma sonradan idmana meylli olmalıdır ki, əldə etdiyi çəkini normal saxlamağa müvəffəq olsun. Əməliyyatın ilkin vaxtlarında az qida qəbul etdiyi üçün protein və bəzi vitamin qəbulu vacib ola bilər. Amma normal qidalanma bərpa olunanda buna ehtiyac qalmır".
Günel CƏLİLOVA
