Şahin Camalov: "Keçidlərdən istifadə etmək mədəniyyətinin olmaması qəzaların baş verməsinə və..."
Bu ilin 10 ayında Azərbaycanda piyadaların ölümü ilə nəticələnən yol-nəqliyyat hadisələrinin statistikası açıqlanıb. Baş Dövlət Yol Polisi İdarəsindən verilən məlumata görə, 2016-cı ilin 10 ayı ərzində respublika ərazisində qeydə alınan 1677 yol-nəqliyyat hadisəsindən 41,8 %-ni (702) piyadaların vurulması təşkil edib.
Nəticədə 257 piyada ölüb, 516 nəfər xəsarət alıb. Qeydə alınmış yol-nəqliyyat hadisələri nəticəsində 46 nəfər uşaq və yeniyetmə ölüb, 165 nəfərsə xəsarət alıb. 2015-ci ilin müvafiq dövrü ilə müqayisədə azyaşlıların iştirakı ilə baş vermiş yol-nəqliyyat hadisələrində ölənlərin sayı 14, xəsarət alanların sayı isə 8 nəfər azalıb.
Artıq neçə ildir Daxili İşlər Nazirliyinin Dövlət Yol Polisi İdarəsinin əməkdaşları tərəfindən avtomobil yollarında piyada zolağı olmayan ərazilərdən keçən piyadalar cərimələnir. Bu proses Bakı şəhərində daha ciddi şəkildə həyata keçirilir. Amma buna baxmayaraq, piyadalar yenə də piyada zolağı olmayan yerlərdə yolu keçməklə özlərinin və digərlərinin həyatını təhlükəyə atır. Bakıda əhalinin sıx olduğu ərazilərdə yeraltı və yerüstü keçidlər olsa da, piyadalar həmin keçidlərdən istifadə etmədən yolun hərəkət zolağından keçməyə cəhd edir. Nəticədə yüzlərlə piyada yol qəzalarının qurbanı olur və ya müxtəlif dərəcəli bədən xasarətləri alır.
Maraqlıdır, ekspertlər ötən 10 ayda piyadə ölümü ilə nəticələnən qəzaları nə ilə əlaqələndirir?
Sözügedən məsələ ilə bağlı fikirlərini "Bakı-Xəbər"lə bölüşən Təhlükəsiz Yol Alyansının koordinatoru Şahin Camalovun sözlərinə görə, bu daha çox piyadaların günahı üzündən baş verir: "Əksər hallarda günah piyadalarda olur. Bunu da şərtləndirən bir sıra faktorlar var. Birincisi, piyadalar yol hərəkəti qaydalarına ciddi yanaşmır. Hardan keçmək olar, hardan olmaz, yol nişanları nəyi bildirir və sair məqamlara fikir vermirlər. İkincisi, yeraltı və yerüstü keçidlərdən istifadə olunması bir mədəniyyətdir. Təəssüflər olsun ki, bir çox piyadalar buna əməl etmir. Keçidlərdən istifadə etmək mədəniyyətinin olmaması qəzaların baş verməsinə və nəticədə piyadaların həyatını itirməsinə gətirib çıxarır. Piyadaların vurulması ilə nəticələnən qəzalar əsasən Bakı şəhərində baş verir. Yolların nişanlanması ilə bağlı ciddi problemlər var. Bu da xüsusi əhəmiyyət kəsb edir. Məsələ ondadır ki, bir sıra yollarda yol nişanları yoxdur. Görürsən ki, yolun bir hissəsində piyada keçidi var, digər hissəsində yoxdur. Sanki piyada ortada qalır. Piyada ölümlərinin bir səbəbi də yüksək sürətlə bağlıdır. Hesab edirəm ki, bütün bunlara kompleks yanaşma olmalıdır. Ən başlıcası, ciddi maarifləndirmə işi aparılmalıdır". Vidadi ORDAHALLI
