Məhərrəm Zülfüqarlı: "Nəticədə xarici turistlər Azərbaycanı daha yaxından tanıyacaq"
Azərbaycanda "İpək yolu" turizm marşrutu üzrə "qatar turizmi"nin inkişaf etdirilməsi təklif edilir. Azərbaycan Turizm Assosiasiyası sədrinin müşaviri Müzəffər Ağakərimov bununla bağlı mətbuata açıqlamasında bildirib ki, bu vasitə ilə "İpək yolu" üzərində yerləşən ölkələrdən Azərbaycana turist cəlb etmək olar.
Azərbaycanda qatar vasitəsilə turizmin hələ sovet dövründə mövcud olduğunu deyən M.Ağakərimov qeyd edib ki, qatar həm çox sayda turist daşıya bildiyindən, həm də turistlərə müxtəlif yerlərə ekskursiya imkanı verdiyindən, onu ölkəmizdə inkişaf etdirmək sərfəlidir.
M.Ağakərimov hesab edir ki, Bakı-Tiflis-Qars və Astara (İran)-Astara (Azərbaycan) dəmir yolu açıldıqdan sonra Azərbaycanda "qatar turizmi"ni inkişaf etdirmək olar.
Onun fikrincə, "İpək yolu" üzərində yerləşən Çin, Qazaxıstan, Özbəkistan, Qırğızıstan, Türkiyə, İran və Azərbaycan turist cəlb etmək üçün birgə marşrutlar hazırlamalıdır: "Bu yol Çindən başlayıb Türkiyədə başa çatır. "İpək yolu" üzrə bir neçə marşrut var. Onların bəzisi İrandan, bəzisi də Orta Asiya - Qırğızıstan, Qazaxıstan, Özbəkistandan keçir. Buna görə də "İpək yolu" üzrə bir deyil, bir neçə turizm proqramı tərtib oluna bilər. Marşrut istiqamətlərinə Rusiya da daxil ola bilər".
M.Ağakərimov qeyd edib ki, "İpək yolu" üzərində yerləşən ölkələrdən Azərbaycana turist cəlb etmək üçün həmin ölkədən gələcək turistlərin maraqları, istəkləri öyrənilməli, bunun əsasında da proqramlar hazırlanmalı və həyata keçirilməlidir.
Turizm sektorunun Azərbaycanda inkişaf etdirilməsinin prioritet olduğu bir vaxtda "qatar turizmi"nin perspektivlərini ekspertlər necə dəyərləndirir? Məsələyə münasibət bildirən Turizm Universitetinin müəllimi, ekspert Məhərrəm Zülfüqarlının sözlərinə görə, prinsipcə, turizmin bu sahəsini inkişaf etdirmək mümkündür: "Bu il Azərbaycana əvvəlki illərlə müqayisədə daha çox turist gəldi. Qeyri-neft sektorunun inkişaf etdirilməsinin vacib olduğu indiki dövrdə turizm sahəsi mühüm əhəmiyyət kəsb edir. Azərbaycanın bununla bağlı zəngin potensialı var. Müxtəlif iqlimə, landşafta malik rəngarəng təbiəti, tarixi abidələrin yerləşdiyi məkanlar turistlər üçün cəlbedicidir. Sadəcə, bu sektorda xidmət səviyyəsinin artırılması, yeni otellərin tikilib istismara verilməsi və qiymətlərin münasib olması lazımdır. Bu istiqamətdə də müəyyən işlər görülür. Bununla yanaşı, Bakı-Tiflis-Qars dəmir yolu istismara verildikdən sonra səyahət turizmi üçün yeni imkanlar açılacaq. Nəticədə xarici turistlər Azərbaycanı daha yaxından tanıyacaq. Hesab edirəm ki, "qatar turizmi" ilə bağlı digər ölkələrin təcrübəsini öyrənmək lazımdır. O baxımdan bununla bağlı təklifə müsbət yanaşıram. Bu yöndə işləri sürətləndirmək lazımdır ki, turizmin bu sahəsi inkişaf etsin".
Vidadi ORDAHALLI
