Vüsalə Ali: "Belə bir mərkəzin yaradılması küçədə olan sahibsiz heyvanların sayının azalmasına təsir edəcək"
Noyabrın 10-da IDEA Heyvanlara Qayğı Mərkəzinin açılışı olub. Açılış mərasimində Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva iştirak edib.
Məlumat üçün bildirək ki, IDEA Heyvanlara Qayğı Mərkəzinin təməli 2014-cü ilin oktyabrında qoyulub. Mərkəz Bakı şəhərində və ətraf ərazilərdəki sahibsiz heyvanların müayinə və müalicəsi, həmçinin onların qısamüddətli sığınacağı üçün nəzərdə tutulub. Sığınacaq kompleksi Avropa Azərbaycan Cəmiyyətinin dəstəyi ilə, digər dövlətlərin təcrübəsindən istifadə olunmaqla tikilib. Layihə-tikinti işlərinə Böyük Britaniyanın Heyvanlara Qarşı Qəddarlığın Aradan Qaldırılması üzrə Kral Cəmiyyətinin mütəxəssisləri cəlb olunub. Burada sahibsiz heyvanlara peyvənd, sterilizə və zəruri hallarda əməliyyat xidmətlərinin göstərilməsi nəzərdə tutulur. Mərkəzdə tikilən 24 sığınacaq eyni vaxtda mindən çox heyvanın yerləşdirilməsinə imkan verir. Hər sığınacağın yanında gəzinti ərazisi də ayrılıb.
Mərkəzdə klinika və laboratoriyada stasionar müayinə-müalicə aparılmaqla yanaşı, mobil təcili tibbi yardım xidməti də var. Bundan əlavə, yaralı və yaxud peyvəndə ehtiyacı olan sahibsiz heyvanların mərkəzə gətirilməsinə məsul xüsusi qrup fəaliyyət göstərəcək. Mərkəzdə müalicə olunmuş sahibsiz heyvanlar fərqləndirici çiplərlə təchiz olunacaq. Burada, həmçinin, ölkəmizdə ilk dəfə olaraq sahibsiz heyvanların elektron baza sistemi yaradılacaq. Bu sistem heyvanların izlənməsi və onların vaxtında peyvənd olunmasına imkan verəcək.
Sahibsiz heyvanlar üçün Heyvanlara Qayğı Mərkəzinin yaradılması barədə fikir bildirən Azərbaycan Heyvanları Xilasetmə Mərkəzinin rəhbəri Vüsalə Ali "Bakı-Xəbər"ə açıqlamasında qeyd etdi ki, belə bir qurumun yaradılması sevindiricidir: "Sahibsiz heyvanlara dövlət tərəfindən qayğı göstərilməsi fəxr olunası haldır. İmtina olunan, sahibsiz heyvanlarla bağlı cəmiyyətimizə çoxlu sayda müraciət olunur. Bizim təşkilat özəl olsa da, sahibsiz heyvanların hər birinə sahib çıxa bilmirik. Çünki burada saxlanan heyvanların sayı həddindən artıq çox olduğuna görə çıxılmaz vəziyyətdə oluruq. Artıq bir ümid yerimiz var. Sahibsiz heyvanlarla bağlı edilən müraciətləri Heyvanlara Qayğı Mərkəzinə yönəldəcəyik. Belə bir mərkəzin yaradılması küçədə olan sahibsiz heyvanların sayının azalmasına təsir edəcək".
Həmsöhbətimizin sözlərinə görə, havaların soyuq olduğu dönəmdə küçələrdə sahibsiz heyvanların sayı da artır: "Bunu istənilən şəxs müşahidə edə bilər. Son zamanlar sahibsiz heyvanların sayı günü-gündən artır. Yardımsevən insanların köməyi ilə cəmiyyətlərin qəbul edə biləcəyi sahibsiz heyvanların sayı məhduddur. Leyla xanımın təşəbbüsü ilə açılan adıçəkilən mərkəz bu sahəyə çox köməklik edəcək".
V.Ali onu da qeyd etdi ki, Heyvanlara Qayğı Mərkəzi tərəfindən sahibsiz heyvanlarla bağlı qarşılıqlı əməkdaşlıq təklif olunarsa, onlar bunu müsbət dəyərləndirər: "Qayğı Mərkəzinin və bizim də əsas məqsədimiz sahibsiz heyvanlara kömək etməkdir".
Günel CƏLİLOVA
