Bahadur Bilalov: "Bizim turoperatorlar çinli turistlərin regiona dəvət edilməsi yönündə Rusiya turoperatorları ilə birgə işləməlidir"
Çinli turistlərin Azərbaycana gəlişi ilə bağlı Rusiya tərəfi maraqlı təklif irəli sürüb. Rusiya Azərbaycana Çindən turistlərin cəlb olunması məqsədilə birgə turizm paketləri yaratmağı təklif edib. Bu barədə Mədəniyyət və Turizm Nazirliyi Turizm departamentinin rəhbəri Rauf Paşayev məlumat verib. Onun sözlərin görə, Rusiya və Çin "İpək yolu" layihəsi çərçivəsində Rusiyanın cənub regionlarına yeni aviareyslər açmağı planlaşdırır.
R.Paşayev deyib ki, Çin turistlərinin paket turlarına marağını nəzərə alaraq Rusiya bizə birgə paketlərin yaradılmasını təklif edib: "Bu paketlər Şimali Qafqaz bölgəsini və Azərbaycanı əhatə edə bilər".
Rusiyanın bu təklifi Mədəniyyət və Turizm Nazirliyində müzakirə olunacaq.
Çinli turistlərlə bağlı Rusiya nümayəndələrinin irəli sürdüyü təklifi dəyərləndirən turizm sahəsi üzrə ekspert Bahadur Bilalov "Bakı-Xəbər"ə açıqlamasında belə bir təşəbbüsə müsbət prizmadan yanaşdı. Onun sözlərinə görə, uzaq məsafələrə səyahət edən turistlər, bir qayda olaraq, regiona səfər edir. Onların məqsədi bir neçə ölkəni görməkdir: "Yaponiya və koreyalı turistlər "İpək yolu" marşrutu ilə Cənubi Qafqaza səfər edərkən 3 respublikaya gəlir. Həmin turistlər eyni vaxtda Azərbaycan, Gürcüstan və Ermənistana səfər edir".
Ekspert qeyd etdi ki, çinli turistlərlə bağlı rusiyalı turoperatorlar tərəfindən təklif olunan birgə turpaketin yaradılması ideyası reallaşarsa, bunun müsbət nəticələri olar: "Bizim turoperatorlar bu məsələdə yaxından iştirak edib çinli turistləri regiona dəvət edə bilər. Belə bir təklif reallaşarsa, birgə turpaket yaradılarsa, bunun həm Rusiyaya, həm də Azərbaycana faydası olacaq".
Həmsöhbətimizin sözlərinə görə, çinli turistlərin Azərbaycana səfəri reallaşarsa, bu, ölkəmizin turizm sektoruna müsbət təsir göstərəcək: "Bəllidir ki, bu il ölkəmizə çoxlu sayda ərəb səyahət etdi. Ərəb turistlərinin səfəri tək turizm sahəsinə deyil, eyni zamanda, iqtisadiyyata öz təsirini göstərdi. Çinli turistlərin də səfəri təşkil olunarsa, analoji hal yenidən yaşanar. Bununla da Azərbaycan turizmi tək Avropa və ərəb ölkələrində deyil, Asiyada da tanınar".
Günel CƏLİLOVA
