"Azercell Telekom" MMC-nin Kaspi Təhsil Şirkəti ilə birgə təşkil etdiyi jurnalistlər üçün ingilis dili kurslarının növbəti mərhələsi başa çatıb. Noyabrın 10-da keçirilən mətbuat konfransında Londona təhsil almağa gedən daha 2 jurnalistin adı açıqlanıb. 2017-ci ildə Londona səfər edəcək qalib jurnalistlər Səadət Məmmədova və Samir Hüseynov oldular. Bu jurnalist tələbələr kurs müəllimləri tərəfindən keçirilən imtahanlarda yüksək nəticələr göstərərək Böyük Britaniyada ingilis dilini təkmilləşdirmək imkanı qazanıb.
Tədbirdə bu il ingilis dili kursunu uğurlu başa vuran jurnalistlərə sertifikatlar təqdim olunub.
Qeyd edək ki, sözügedən layihə zamanı 6 ay ərzində mətbuat nümayəndələri bir neçə səviyyədən ibarət ingilis dili proqramı üzrə tədris keçib. Nəticədə jurnalistlər ingilis dilinin qrammatikası, danışıq və yazı bacarıqlarına yiyələnib. Kursların məqsədi azərbaycanlı jurnalistlərin dil öyrənməsinə kömək etmək, onların ingilisdilli mənbələrdən sərbəst istifadəsinə yardımçı olmaqdan ibarətdir.
Məlumat üçün bildirək ki, "Azercell" şirkəti jurnalistlər üçün xarici dil kurslarını artıq 6 ildir təşkil edir. Bu günə kimi yüzlərlə KİV nümayəndəsi ixtisaslaşmış xarici dil kurslarında iştirak edib. Bununla da KİV nümayəndələrinin inkişafına yönələn bu layihə ilə "Azercell" şirkəti onların peşəkar bacarıqlarının artırılmasına və beynəlxalq əlaqələrinin qurulmasına dəstək olur.
Xatırladaq ki, "Azercell Telekom" fəaliyyətdə olduğu müddət ərzində media nümayəndələri üçün daim maraqlı layihələr təşkil edib. "Azercell" yeganə mobil operatordur ki, sırf KİV işçiləri üçün xüsusi tarif planı - "Mediacell" tarifini hazırlayıb. "Azercell Telekom", hər zaman olduğu kimi, Azərbaycan mətbuatının inkişafına öz dəstəyini göstərməkdə davam edəcək.
"Azercell" şirkətinin təşkil etdiyi ingilis dili kurslarına növbəti qeydiyyat barədə mətbuat nümayəndələrinə əlavə məlumat veriləcək.
Daha ətraflı məlumat üçün [email protected] ünvanına müraciət edə bilərsiniz.
