Adil Qeybulla: "İran-Azərbaycan müştərək səhiyyə layihələrinin həyata keçirilməsinin müsbət tərəflərindən biri dəədərman mütəxəssislərinin yetişdirilməsi olacaq"
İran Azərbaycanda xəstəxana tikmək niyyətindədir. Bu sözləri İranın Azərbaycandakı səfiri Cavad Cahangirzadə jurnalistlərə açıqlamasında deyib. Səfirin sözlərinə görə, xəstəxana Azərbaycan və İran prezidentlərinin təşəbbüsü ilə tikiləcək.
Qeyd edək ki, iki həftə sonra Azərbaycan-İran birgə əczaçılıq zavodunun təməlqoyma mərasimi keçiriləcək.
Azərbaycan-İran birgə layihəsi nəticəsində səhiyyə sahəsində layihələr həyata keçirilir.
Məsələ ilə bağlı fikir bildirən tibb sahəsi üzrə ekspert, professor Adil Qeybulla "Bakı-Xəbər"ə açıqlamasında qeyd etdi ki, İran mütəxəssislərinin əksəriyyəti Qərb ölkələrində təhsil alıb: "İran səhiyyə mütəxəssisləri diplomdan sonrakı rezidentura təhsilini Avropa ölkələrində alıb. Bu baxımdan İran səhiyyəsini Qərb səhiyyəsinin bir hissəsi hesab etmək olar. Azərbaycanda İran xəstəxanası yaradılsa, Qərb təbabəti ölkəmizdə də inkişaf edər".
Professorun sözlərinə görə, iran preparatlarının keyfiyyət parametrləri Azərbaycan dərman bazarı ilə müqayisədə yüksəkdir: "Yaxşı olardı ki, biz Avropa şirkətləri ilə əməkdaşlıq edərdik. Dünyanın aparıcı şirkətlərinin burada filialı olardı".
Həmsöhbətimiz bildirdi ki, Azərbaycanın dərman sənayesi üçün atılan hər bir addım önəmlidir: "Xatırladım ki, Sovet dönəmində Azərbaycanda farmakoloji zavod var idi. Həmin zavodda mürəkkəb struktura malik preparatlar istehsal olunmasa da, müəyyən qrup dərmanlar Azərbaycanda istehsal olunurdu. Dərman sənayesinin inkişafı üçün bu sahədə mütəxəssis hazırlanmasına ehtiyac var. İran-Azərbaycan müştərək səhiyyə layihələrinin həyata keçirilməsinin müsbət tərəflərindən biri dəədərman mütəxəssislərinin yetişdirilməsi olacaq".
Günel CƏLİLOVA
