Bir neçə gün bundan öncə keçirilən tədbirdən kiçik bir xəbər hazırlamaq çətin deyildi. Düzü, tədbirdəki bəzi nüansları qəlibə salmağa, ordakı müşahidələrimi konkretləşdirməyə ürəyim gəlmədi. Həm də gördüklərimi yazmağa imkan var ikən niyə xəsislik etməliydim ki?..
Diqqətinizə çatdırım ki, insan oğlunun qəniminə, əsrlərin bəlasına (söhbət XX və XXI əsrdən gedir) çevrilən narkomaniya ilə mübarizəyə bu gün bütün dövlət qurumları səfərbər olub. Əlbəttə ki, onunla daha ciddi mübarizəni isə polis aparır. Polis təkcə mübarizə aparmır, həm də bu bəlaya düçar olmamaq üçün gənclər, yeniyetmələr, elə böyüklər arasında da profilaktik tədbirlərin geniş təbliğatına da xüsusi diqqət yetirir. Çünki qapımızı döyən bəlanın hər birimizi, xüsusən də gəncliyimizi hədəf almasının fərqindəyik.
Elə Səbail RPİ-nin, Ombudsman aparatının, Səbail RİH-nin əməkdaşlarının da iştirak etdiyi 162 və 51 nömrəli məktəblərdə keçirilən tədbirlərin də əsas qayəsi bu idi. Necə edək ki, cəmiyyətimizin hərəkətverci qüvvəsini, sabahına inandığımız, səngərdə əsgər, idman arenalarında bayrağımızı qaldıran, himnimizi səsləndirən güclü idmançı, auditoriyada müəllim olan gəncliyimizi zərərli vərdişlərdən, pis əməllərdən qoruya bilək...
162 nömrəli məktəbdə olarkən şagirdlərin bir-birinə "Bu dəfə də polislər, deyəsən, bizə yenə narkomaniyadan danışacaq" pıçıltısını eşitdim və ürəyimdə buna çox sevindim. Sevindim ki, doğurdan da Azərbaycan Polisi ona verilən bütün tapşırığın, göstərişin öhdəsindən layiqincə gəlməyə çalışır. Bu tanış mənzərə ondan xəbər verirdi ki, həmkarlarımız mütəmadi məktəblərdə olur, zamanın və polis peşəsinin tələbinə həm də vətəndaş yanğısı ilə yanaşırlar.
Məktəbin akt zalı dolmuşdu. 9,10,11-ci sinif şagirdləri ilə yanaşı, 7-ci, 8-ci sinif şagirdlərinin tədbirdə nümayiş etdirilən videoçarxdan sonra üzünə baxanda bir qorxu, həyəcan gördüm. Narkomaniyanın təkcə bəla yox, həm də ölümü tezləşdirən sarsıdıcı əzab olduğunu gözləri ilə görən şagirdlər onun qurbanı olanların taleyinə acıyırdılar.
RPİ-nin şəxsi heyətlə iş üzrə rəis köməkçisi, polis polkovnik-leytenantı Anar Hüseynov bu gün dünyada narkomaniyanın gəncləşdiyinə diqqət çəkib 200 milyondan çox insanın onun təsiri ilə həyatla vidalaşdığını qeyd etdi. Narkotik vasitələrin əkilməsinin, becərilməsinin, daşınmasının, qanunsuz dövriyyəsinin, istifadəsinin cinayət əməli olduğunu və Cinayət Məcəlləsində bu kimi əməlləri törədənlərin həbsi ilə bağlı qətimkan tədbirinin seçildiyini də bildirdi.
İnsan üçün ən şirin nemətin azadlıq olduğunu vurğulayan RPİ-nin Yetkinlik yaşına çatmayanlarla profilaktik işin təşkili bölməsinin rəisi, polis polkovnik-leytenantı Anar Nağıyev DİN rəhbərliyinin göstərişi ilə keçirilən belə maarifləndirici tədbirlərin Səbail rayonunda yerləşən təlim-tədris ocaqlarında mütəmadi keçirildiyini və bunun effektli olduğunu dedi.
Narkomaniya ilə mübarizədə valideyn, məktəb-müəllim və polis üçlüyünün vəhdətinə diqqət çəkən polis mayoru Gülzar Əliyeva artıq qızların da siqaret çəkməsi hallarına rast gəlindiyindən danışdı. Bəzi orta məktəblərdə qızların siqaret çəkməsi isə problemin ciddiliyindən xəbər verir. Bununla də bağlı polis həyəcan təbili çalmaqdadır...
"Kimin sualı var" deyəndə şagirdlərdən biri əlini qaldırıb: "Siqaret çəkmək cinayət əməlidirmi" sualını verdi. Düzü, bu sualı gözləmirdik. Polis mayoru Gülzar Əliyeva "Siqaret çəkmək cinayət əməli deyil" cavabını verəndə söhbətə qoşulmağı özümə borc bildim. Dedim: "Əziz şagirdlər, siz valideyn himayəsində yaşayırsınız. Heç bir yerdən qazancınız, gəliriniz yoxdur. Məktəbdə nəsə almaq üçün valideynləriniz sizə cibxərcliyi verir. Sizlərdən bəziləri isə, siqaret çəkənləri nəzərdə tuturam, o pulu siqaretə verir. Düzdümü?". Şagirdlərdən iki-üç nəfəri "bəli" dedi. Onlar siqaret çəkənlər idi...
Və sözümə davam etdim: "Valideyn pul verməyəndə isə siqaret çəkən şagird dostuna, tanışına ağız açır. Rədd cavabı alanda isə pərt olur. Sonra həmin şagird siqaret "azarını" öldürmək üçün oğurluğa əl atır. Atasının cibindən, anasının pul kisəsindən oğurluq edir. Beləcə, siqaret həmin şəxsi cinayət törətməyə, oğurluq etməyə istiqamətləndirir..
Ombudsman aparatının əməkdaşı İlahə Əfqanlı şagirdlərə uşaq hüquqlarından, dövlətimizin uşaqlara, onların sağlamlığına, təhsilinə ayırdığı diqqətdən söz açdı, onlara bukletlər payladı...
51 nömrəli məktəbin foyesindəki stend diqqətimi çəkdi. Burda məktəbin şəhid məzunlarının adları və şəkilləri verilmişdi. Həmin adları sakitcə qeyd dəftərimə köçürdüm.
Burda da narkomaniya, erkən nikah və dini radikalizmlə bağlı şagirdləri maarifləndirdik. Onlara zərərli vərdişlərdən uzaq durmağı, yaxşı oxumağı, hər zaman bir-birindən gözəl əməllərlə fərqlənməyi tövsiyə etdik...
Beynimdəki fikri onlara çatdırmaq üçün məqam yetişmişdi. DİN Mətbuat Xidmətinin əməkdaşı kimi mənə söz veriləndə "Əziz müəllimlər və əziz şagirdlər, xahiş edirəm, indi adlarını çəkdiyim şagirdlər ayağa qalxsın",- dedim. Zala bir anlıq sükut çökdü. Hətta yenicə təyin olunmuş məktəb direktoru Tərlan Bayramova da tutulan kimi oldu. Adları bir-bir oxumağa başladım: "Daşqın Səmədov, Müşfiq Nəbiyev, Zülfüqar Atəşli, Vaqif Mehbalıyev, Elçin Əzizov, Şahlar Allahverdiyev, Vüsal Hacıbabayev və Camal Əliyev"...
Adları çəkilən şagirdlərin heç biri zalda yox idi...
Bu səhnə Aqil Abbasın "Çadırda Üzeyir bəy doğula bilməz" romanında var. Müəllim uçulub-dağılmış sinif otağında xəyalən şəhid olmuş şagirdləri ilə danışır...
Mənə elə gəldi ki, bir anlıq hamı donub. "İndi də gəlin onların əziz xatirəsini bir dəqiqəlik sükutla yad edək" deyəndə hamı bir nəfər kimi ayağa qalxdı. Müəllimlər isə kövrəlmişdi...
Əsrimizin bəlasına və bu gün ən xırda məişət problemi kimi gündəmi zəbt edən, hətta ailə faciələrinə yol açan erkən nikahlara həsr olunmuş tədbirdə yaşananları sizlərlə bölüşməklə diqqətinizi, fikrinizi bir məcraya yönəltmək istədim, əziz oxucular. Gəlin, birlikdə gəncliyimizi, gələcəyimizi qoruyaq, tariximizə, keçmişimizə sahib çıxaq, bugünümüzü isə elə yaşayaq ki, gələcəyə nəyisə miras qoymağa üzümüz, deməyə sözümüz olsun...
Hafiz Təmirov polis mayoru
