Rasif Bağırov: "Bakıda Sanaviasiya adlı xidmət var, həmin xidmətdən istifadə edib xəstələri rayondan Bakıya gətirsinlər. Sanaviasiya nədən ötrü yaradılıb?"
Rayonlardan paytaxta təcili yardım maşını ilə xəstə göndərilməsi qadağan edilib. Zaqatala rayonundan APA-ya daxil olan müraciətdə bildirilir ki, Zaqatala Rayon Mərkəzi Xəstəxanasından xəstənin təcili yardım maşınları ilə Bakıya gətirilməsi müşkülə çevrilib.
Müraciətdə qeyd olunur ki, xəstənin yaxınları onu Bakıya gətirmək istəsə də, təcili yardım buna icazələrinin olmadığını deyib. Bildirilib ki, təcili yardım maşınlarında quraşdırılan CPRS vasitəsilə onların fəaliyyətinə nəzarət olunur və rayondan çıxmalarına icazə verilmir. Belə olduğu halda, Bakıdan təcili yardım maşını göndərilməli, xəstəni Bakıya gətirməlidir. Bundan əlavə, xəstə Bakıya aparılsa belə, onun özəl xəstəxanalara yerləşdirilməsinə icazə yoxdur. Xüsusi hallarda xəstə təcili yardım briqadaları vasitəsilə Bakıya gətirilsə, onlar yalnız əvvəldən müəyyənləşdirilən bəzi xəstəxanalara yerləşdirilir. Qeyd edək ki, bu qaydalar yalnız Zaqatalada deyil, digər şəhər və rayonlarda da tətbiq edilir.
Belə bir qaydanın nə səbəbdən tətbiq olunması ilə bağlı fikir bildirən səhiyyə sahəsi üzrə ekspert Rasif Bağırov "Bakı-Xəbər"ə açıqlamasında qeyd etdi ki, qaydalara görə, xəstə hansı əraziyə aiddirsə, təcili yardım maşınları o şəxsi həmin ərazidə olan xəstəxanaya çatdırmalıdır: "Xəstənin vəziyyəti doğrudan da ağırdırsa və onun müalicəsi yalnız paytaxtda mümkündürsə, o zaman təcili yardım maşını onu dərhal Bakıya gətirməlidir. Xəstənin rayondan Bakıya gətirilməsi üçün buradan maşın göndərilməsi kommersiya söhbətidir. Etiraf etmək lazımdır ki, Bakı ilə müqayisədə rayonlarda təcili yardım müraciətləri çox azdır. Rayonda yaşayanlar daha çox öz yaxınlarında yaşayan həkimə müraciət edir".
Həmsöhbətimiz bildirdi ki, təcili yardım maşınları ilə xəstənin Bakıya göndərilməsinin mümkün olmadığını onunla izah edirlər ki, guya əhaliyə xidmət səviyyəsi aşağı düşür: "Rayonda fəaliyyət göstərən təcili yardım maşınları həmişə çağırışlara gedirsə, paytaxta xəstə gətirəndə onların işi axsayarsa, o zaman Bakıdan dəstək veriləcək. Bakıda Sanaviasiya adlı xidmət var. Həmin xidmətdən istifadə edib xəstələri rayondan Bakıya gətirmək olar. Sanaviasiya xidməti nədən ötrü yaradılıb? Sanaviasiya kifayət qədər təchizata malikdir. Orada helikopter və xüsusi təcili yardım maşınları var".
Günel CƏLİLOVA
