Seyid Camal Əzimbəyli: "Maarifləndirmə işini proqramlı şəkildə həyata keçirsək, o zaman qanunsuz dini ədəbiyyatın təsirini minimuma endirmək olar"
Məlum olduğu kimi, Daxili İşlər Nazirliyi Dini Qurumlarla İş üzrə Dövlət Komitəsi ilə birgə "Dini etiqad azadlığı haqqında" Azərbaycan Respublikası Qanununun tələblərindən irəli gələn vəzifələrin icrasını təmin etmək, dini təyinatlı ədəbiyyatın, audio və videomaterialların, digər dini məzmunlu materialların müvafiq icra hakimiyyəti orqanının razılığı ilə yaradılan ixtisaslaşdırılmış satış məntəqələrindən kənarda satılmasının qarşısının alınması məqsədilə mütəmadi olaraq müvafiq tədbirlər həyata keçirir.
Belə ki, cari ilin 9 ayı ərzində dini qurumların yaradılması və fəaliyyət qaydasını, eləcə də dini etiqad azadlığı haqqında qanunvericiliyin tələblərini pozmuş 172 nəfər müəyyən edilərək onlardan 2148 ədəd dini təyinatlı ədəbiyyat, 250 ədəd CD və DVD disklər, 127 ədəd broşur götürülüb.
Təkcə cari ilin oktyabr ayı ərzində birgə tədbirlər nəticəsində paytaxtda satışına razılıq verilməmiş və nəzarət markası ilə markalanmamış 303 ədəd dini təyinatlı ədəbiyyat, 7 ədəd CD və DVD disklər aşkar edilərək götürülüb. Həmçinin, 4 mağazanın DQİDK-nin razılığı olmadan fəaliyyət göstərməsi də müəyyən edilib. Bu istiqamətdə tədbirlər davam etdirilir.
O da məlum həqiqətdir ki, bu gün internet vasitələri geniş inkişaf edib. Azərbaycanda da əhalinin böyük hissəsi internetdən istifadə edir. Yayımı qadağan olunan dini ədəbiyyat vasitələri yazılı və video formasında internetdə yerləşdirilir. Yəni internet vasitəsilə çox asanlıqla onlardan istifadə etmək mümkündür. Nəticədə bəzi gənclər bunun təsiri altına düşür. Bəs belə hallara qarşı necə mübarizə aparmaq olar?
Məsələyə münasibət bildirən şərqşünas Seyid Camal Əzimbəylinin sözlərinə görə, bununla bağlı çıxış yolu geniş və proqramlı maarifləndirmə işinin aparılmasından keçir: "Əvvəla DQİDK və digər müvafiq qurumlar qanunsuz dini ədəbiyyatın yayılmasına qarşı çox yüksək səviyyədə mübarizə aparır. Bu kimi qanunsuz dini ədəbiyyat vasitələri dövlət, ölkənin milli mənafeyi üçün təhlükəlidir. Ona görə də məzhəblərarası münasibətlərin qızışdırılmasına rəvac verəcək, şərait yaradacaq bu kimi dini ədəbiyyatlar zərərsizləşdirilir. Bu işlərin DİN-lə birgə həyata keçirilməsi təqdir olunasıdır. Yaxşı olardı ki, bu kimi tədbirlər rayonlarda da həyata keçirilsin. Ona görə ki, rayonlarda milli mənəviyyata yönəlik bu cür vasitələr satılır. Ancaq o da var ki, internet dövründə yaşayırıq, qloballaşan dünyanın bir parçasıyıq. Belə olan halda, bu kimi dini ədəbiyyatla mübarizə çətinləşir. İŞİD-in sosial şəbəkə vasitəsilə necə dağıdıcı təbliğat aparmasını hamımız görürük. Ona görə də bununla ancaq geniş maarifləndirmə işi vasitəsilə mübarizə aparmalıyıq. Bağçalarda, orta ümumtəhsil məktəblərində, idarə və müəssisələrdə bu yöndə maarifləndirmə işi aparılmalıdır. Maarifləndirmə işini proqramlı şəkildə həyata keçirsək, o zaman qanunsuz dini ədəbiyyatın təsirini minimuma endirmək olar. Bu gün Azərbaycanda bəzi xəbər saytları təkfirçi düşüncəyə malikdir. Onlar hər vəchlə din-dövlət münasibətlərini zədələməyə çalışır. Hesab edirəm ki, bunlara qarşı da mübarizə aparılmalıdır".
Vidadi ORDAHALLI
