Bəşarət Məmmədov: "Bu məsələyə biz baxmırıq"
Son günlər ölkə ərazisində soyuq hava şəraiti müşahidə olunmaqdadır. Temperaturun kəskin şəkildə aşağı düşməsi Bakıda və regionlarda yerləşən məktəblərin istilik problemini yenidən gündəmə gətirib. Sosial şəbəkələrdə bir çoxları bu il havanın daha tez soyumasından gileylənərək istiliyin daha tez verilməsini geniş müzakirəyə çıxarıb.
Havaların soyuq və yağıntılı keçməsi ilə əlaqədar paytaxt sakinləri istiliyin vaxtından əvvəl verilməsini tələb edir. Bakının bir neçə rayonunda yerləşən məktəblərə istilik verilməməsi ilə əlaqədar şikayətlər daxil olur. Şikayətlərdə bildirilir ki, məktəblər istiliklə təmin olunmadığına görə şagirdlər soyuq otaqlarda təhsil alır. Havanın soyuq keçməsi səbəbindən valideynlər məktəblərin noyabrın 15-dən sonra yox, daha tez istiliklə təmin edilməsini istəyir.
Məlumat üçün qeyd edək ki, Bakıda 117 məktəb fərdi, 135 məktəb isə mərkəzləşmiş qaydada istiliklə təchiz olunur. Fərdi istilik sisteminə malik təhsil müəssisələrinin qızdırılması üçün şəhər məktəblərinin 61 faizində qazdan, hər biri üzrə 11,3 faiz olmaqla maye və qaz yanacaqdan istifadə edilir.
Bütün hallarda, məktəblərin isidilməsində yaranan problemlərə rəsmilərin münasibəti necədir? Məsələyə münasibət bildirən "Azəristiliktəchizat" ASC-nin Abonent və müştəri xidmətlərinin rəisi Rafiq Əliyevin sözlərinə görə, məktəblərin istiliklə təmin edilməsi "Azəristiliktəchizat"la Bakı Şəhəri üzrə Təhsil İdarəsi arasında bağlanan müqaviləyə əsasən tənzimlənir: "İstilik verilməsi dövrü də il ərzində beş ay müddətinə nəzərdə tutulduğundan, onlarla bu müddət ərzində müqavilə bağlanıb. Bu qurum da büdcə təşkilatı olduğuna görə, yəni dövlət tərəfindən maliyyələşdiyi üçün ancaq beş ayın vəsaiti ödənilib. Təhsil İdarəsi tərəfindən müraciət olunduğu və əlavə müddət üçün veriləcək istilik haqqının ödənişinə təminat verildiyi halda, həmin məsələyə baxıla bilər. İstilik verilməsi noyabrın 15-dən başlayacaq".
Bakı Şəhəri üzrə Təhsil İdarəsinin mətbuat katibi Bəşarət Məmmədov da bənzər fikirləri bildirdi: "Məktəblərin istiliklə təmin edilməsi Təhsil Nazirliyi ilə "Azəristiliktəchizat" arasında müqavilə əsasında həyata keçirilir. Bu məsələyə biz baxmırıq. Təhsil Nazirliyi bir neçə gün bundan öncə məsələ ilə bağlı açıqlama verdi ki, zərurət yarandıqda məktəblər vaxtından əvvəl istiliklə təmin olunacaq".
Təhsil Nazirliyi ilə bununla bağlı əlaqə yaratmaq cəhdlərimiz alınmadı.
Vidadi ORDAHALLI
