İsrafil Kərimov: "Bir neçə gün əvvələ qədər zəbt olunan 3,4 hektar torpaq sahəsi azad olunub, 6 hektar torpaq sahəsində isə araşdırma aparılır"
Məlum olduğu kimi, Səbail rayonunda qanunsuz zəbt olunan torpaq sahələri və qanunsuz tikintilər aşkar olunub. Qanunsuz zəbt olunan torpaqların geri alınması istiqamətində Rayon İcra Hakimiyyətində müəyyən işlər görülür. İşlərin hansı vəziyyətdə olduğunu öyrənmək məqsədilə Səbail Rayon İcra Hakimiyyəti ilə əlaqə saxladıq.
Səbail RİH-in İctimai-siyasi və humanitar məsələlər şöbəsinin müdir müavini İsrafil Kərimov "Bakı-Xəbər"ə açıqlamasında qeyd etdi ki, yaranmış vəziyyət hələ də araşdırılır. Qanunsuz vəziyyət üzə çıxan kimi məsələ yerindəcə həll olunur. Onun sözlərinə görə, Səbail RİH-də yaradılmış işçi qrupu tərəfindən Badamdar qəsəbəsinin 3-cü yaşayış massivində torpaqların inventarlaşması aparılıb: "Aparılan araşdırmalar zamanı müəyyən olunub ki, bu ərazidə, tikilməkdə olan su anbarlarının birbaşa yaxınlığında hektarlarla sahə müxtəlif şəxslər, işbazlar, torpaq alverçiləri tərəfindən saxta sənədlər əsasında zəbt olunub, ərazi hasarlanıb, bir çox yerlərdə qanunsuz tikinti işləri aparılıb. İşçi qrupun apardığı araşdırmaların nəticəsi olaraq, RİH tərəfindən burada zəbt olunaraq hasarlanmış torpaq sahələrinin hasarlarının sökülərək ərazinin ilkin vəziyyətə gətirilməsi prosesinə başlanıb".
İ.Kərimov dedi ki, bir neçə gün əvvələ qədər zəbt olunan 3,4 hektar torpaq sahəsi azad olunub: "6 hektar torpaq sahəsində isə araşdırma aparılır. Araşdırmanın nəticəsi olaraq əlavə tədbirlər görüləcək. Hələlik araşdırmalar davam edir. Araşdırmalar yekunlaşan kimi nəticələr mətbuata açıqlanacaq".
Həmsöhbətimiz qeyd etdi ki, 2000-ci ildən etibarən icra hakimiyyətlərinin torpaq satmaq səlahiyyəti yoxdur. Bu məsələlərlə ancaq bələdiyyələr məşğul olur: "Aparılan araşdırmalar zamanı üzə çıxan saxta sənədlər də ancaq bələdiyyəyə məxsusdur. Onu da deyim ki, prokurorluğun araşdırmasından sonra saxta sənədlərlə torpaq satan şəxslər məsuliyyətə cəlb olunacaq".
Günel CƏLİLOVA
