Təranə Şükürlü: "Ədəbi dil normalarının qorunması ilə bağlı keçirilən monitorinqlər əsasən xəbər proqramları və şou verilişlərini əhatə edəcək"
AMEA Nəsimi adına Dilçilik İnstitutu ədəbi dil normalarına riayət edilməsi sahəsində teleradio yayımçılarının proqramlarının növbəti dəfə monitorinqini aparacaq.
Bu barədə AMEA Nəsimi adına Dilçilik İnstitutunun Monitorinq şöbəsinin müdiri Sevinc Əliyeva mətbuata açıqlamasında məlumat verib. O bildirib ki, monitorinqlər 1-30 noyabr tarixlərində aparılacaq, monitorinqin nəticələri dekabrın əvvəllərində elan olunacaq.
Şöbə müdirinin sözlərinə görə, monitorinqlər mütəmadi aparılacaq, İTV, ATV, "Space", "Xəzər" və "Lider" telekanallarını əhatə edəcək. S.Əliyeva əlavə edib ki, AzTV və ARB televiziya kanallarında yayımlanan proqramların monitorinqinin ayrıca aparılması planlaşdırılır.
S.Əliyeva qeyd edib ki, monitorinqlərdə Milli Televiziya və Radio Şurasının mütəxəssisləri iştirak etməyəcək.
Televiziya kanallarında ədəbi dil normalarına necə riayət olunması ilə bağlı Dilçilik İnstitutunun əməkdaşları tərəfindən bir neçə dəfə monitorinq aparılıb. Monitorinqin nəticələri ictimaiyyətə açıqlanıb.
Azərbaycan Milli Elmlər Akademiyası Dilçilik İnstitutunun mətbuat xidmətinin rəhbəri Təranə Şükürlü "Bakı-Xəbər"ə açıqlamasında qeyd etdi ki, ədəbi dil normalarının gözlənilməsi üçün televiziya kanallarında monitorinq aparılır: "Mən sizə deyim ki, televiziyaların monitorinqin keçirilməsinə dair heç vaxt sərt reaksiyası olmayıb. Əvvəllər bəzi telekanalların reaksiyası fərqli idi. Ancaq indi, demək olar ki, bütün kanallar monitorinqin nəticəsini gözləyir, hesabatlarda iştirak edir".
Həmsöhbətimizin sözlərinə görə, Dilçilik İnstitutunun keçirdiyi növbəti monitorinq yeni başlayıb: "Monitorinq İTV, ATV, "Space", "Xəzər" və "Lider" və ARB kanallarında aparılacaq. Əsasən xəbər proqramlarıı və şou verilişlərini əhatə edəcək".
T.Şükürlü bildirdi ki, əvvəl keçirilən monitorinqlərdə ədəbi dil normalarına riayət etməyən aparıcıların adları açıqlanmışdı. Artıq o vaxtdan bəri müsbət dəyişikliklər hiss olunur: "Bəzən elə hal olur ki, aparıcılar veriliş zamanı öz səsini dəyişir. Bu da bizə xoş təəssürat bağışlayır. Həmin aparıcılar artıq öz məsuliyyətini dərk edir. Ancaq yeni verilişlər də yaranır və proqramların monitorinqdən xəbəri yoxdur. Ədəbi dil normalarının qorunması ilə bağlı televiziya kanallarında keçirilən monitorinqin nəinki yeni, eyni zamanda köhnə verilişlərə də tətbiqi zəruridir".
Günel CƏLİLOVA
