Dünən Azərbaycan Tibb Universitetində (ATU) Tələbələr və Gənc Həkimlərin III Beynəlxalq Tibb Konqresi öz işinə başlayıb. İki gün davam edəcək konqresin açılış günündə müxtəlif ölkələrdən nümayəndələr, ATU-nun professor-müəllim heyəti, tələbələri iştirak edib.
Konqresin açılışında çıxış edən ATU-nun elmi işlər üzrə prorektoru Rauf Bəylərov qeyd edib ki, "Hər il ənənəvi olaraq Azərbaycan Tibb Universiteti Tələbələri və Gənc Həkimlərinin Beynəlxalq Tibb Konqresi keçirilir. I Beynəlxalq Konqres 2014-cü ilin mayında ulu öndər Heydər Əliyevin əziz xatirəsinə həsr edilib. Həmin konqresə 20-dən artıq xarici universitetin təmsilçiləri qatılıb. II Beynəlxalq Konqres 2015-ci ilin noyabrında keçirilib və bura 30-dan artıq universitetin nümayəndələri qatılıb. Bu il 450-dən artıq nümayəndə rəsmi qeydiyyatdan keçib. Bunlardan 104 nəfəri ayrı-ayrı xarici universitetlərin professor, müəllim və tələbə heyətidir".
Prorektor R.Bəylərov ali məktəb qarşısında duran ən böyük vəzifələrdən biri, bəlkə də birincisinin istedadlı və ixtisaslışmış kadrların hazırlanması olduğunu, bu baxımdan aparılan işlərdə Tələbə Elmi Cəmiyyətinin xüsusi rolu olduğunu qeyd edib: "Ölkəmiz cənab Prezident İlham Əliyevin rəhbərliyi altında bir çox beynəlxalq tədbirlərə, forumlara ev sahibliyi edir. Bu tədbirlərin aparılmasının nəticəsidir ki, artıq xarici tələbələrin ölkəmizə marağı durmadan artır. Bu gün bu konqresə qatılan iştirakçılar bunu bir daha sübuta yetirdilər".
Prorektor konqresi açıq elan edərək, onun işində iştirak edən hər kəsə uğurlar arzulayıb.
Daha sonra Türkiyə İstanbul Universitetinin tibb fakültəsinin professoru Levent Aftan çıxış edərək, tədbir iştirakçılarının səmimiyyətlə salamlayıb və "Bu konqresdə sizlərlə bərabər olmağın xoşbəxtliyini yaşayıram" - deyib: "Hər birinizi ürəkdən salamlayıram. Bu konqresin beynəlxalq səviyyədə təşkilini tibb elminə verilən dəyər kimi qəbul edirəm. İnanıram ki, bu gün burada iştirak edən gənclər arasından tanınmış elm adamları çıxacaq".
İstanbul Universitetinin tibb fakültəsinin professoru Levent Aftan həmçinin universitetlərində Azərbaycan kökənli eytim alan 750 tələbənin olduğunu deyib və bunların 150 nəfərinin tibb fakültələrində təhsil aldığını nəzərə çatdırıb.
O həmçinin İstanbul Universitetində 2 tibb fakültəsinin - İstanbul və Cərrahpaşa tibb fakültələrinin olduğunu deyib. Bildirib ki, hər iki fakültədə 110 nəfər azərbaycanlı tibb doktoru müxtəlif ixtisaslar üzrə tibbi təhsil alır.
Tula Tibb Universitetindən Tatyana Subbotina əvvəlcə dəvətə görə təşəkkürünü bildirib, bütün əməkdaşlara uğurlar arzulayıb. Bakıda olmağından məmnunluğunu bildirib. Tula Tibb Universitetində dərc olunan jurnalda gəncləri elmi məqalələrlə çıxış etməyə dəvət edib.
Daha sonra plenar iclas öz işinə start verib. Plenar iclasda ATU-nun nümayəndələrinin çıxışı ilə yanaşı, Milli Onkoloji Mərkəzdə aparılan geniş spektrli əməliyyatlar barədə Niyazi Əsgərov məlumat verib. Konqresdə Almaniyadakı Araşdırmalar Mərkəzindən Mehdi Əhmədur, Türkiyədən Tuğba Uysal prezentasiya ilə çıxış edib.
