Bahadur Bilalov: "Bu qərar turizmin inkişafına təsir göstərən amillərdən biridir"
Xəbər verildiyi kimi, Azərbaycanda şəhər və rayonların turizm-mədəniyyət şöbələri yerli icra hakimiyyətlərinin tabeliyindən çıxarılaraq Mədəniyyət və Turizm Nazirliyinin tabeliyinə verilib. Bu dəyişiklik Prezident İlham Əliyevin oktyabrın 28-də imzaladığı fərmanlarda nəzərdə tutulur. Xatırladaq ki, həmin gün dövlət başçısı 2 fərman imzalayıb.
Onlardan biri "Yerli icra hakimiyyətləri haqqında Əsasnamə"yə dəyişiklik edilməsi barədədir. Fərmana əsasən, Əsasnamədən 4.12.7. (mədəni-maarif idarələrinin işini təşkil etmək) bəndi çıxarılıb. Yəni bundan sonra yerli icra hakimiyyətləri mədəni-maarif idarələrinin işini təşkil etməyəcək. Xatırladaq ki, indiyədək mədəni-maarif idarələrinin (bura turizm və mədəniyyət, eləcə də təhsil şöbələri aiddir) işini yerli icra hakimiyyətləri təşkil edirdi. Bu idarələrə rəhbər və digər təyinatlar da yerli icra hakimiyyətlərinin səlahiyyətinə aid idi. Belə ki, mədəniyyət və turizm şöbəsinin rəhbərini yerli icra hakimiyyəti təyin edirdi (Mədəniyyət və Turizm Nazirliyi ilə razılaşdırmaqla). İndi isə bu səlahiyyət də yerli icra hakimiyyətlərindən alınıb.
Şəhər və rayonların turizm-mədəniyyət şöbələrinin yerli icra hakimiyyətlərinin tabeliyindən çıxarılaraq Mədəniyyət və Turizm Nazirliyinin tabeliyinə verilməsi barədə fikir bildirən turizm sahəsi üzrə ekspert Bahadur Bilalov "Bakı-Xəbər"ə açıqlamasında bunları qeyd etdi: "Əvvəllər də şəhər və rayon turizm mədəniyyət şöbələri Mədəniyyət və Turizm Nazirliyinə tabe idi. Sadəcə, onların rəhbərlərinin təyin edilməsi rayon icra hakimiyyətlərinin razılığı ilə olurdu. Əgər əvvəllər Mədəniyyət və Turizm Nazirliyi hansısa mədəniyyət və ya turizm şöbəsinə şöbə müdiri təyin etmək istəyirdisə, mütləq yerli icra hakimiyyətinin bundan xəbəri olmalı idi. Ancaq indi bir çox nazirliklərin yerli idarəetmə orqanları birləşdirilir və regional mədəniyyət turizm şöbələri yaradılır. Bu baxımdan ayrı-ayrı rayon icra hakimiyyətlərinin razılığına ehtiyac qalmır. Adıçəkilən məsələ Mədəniyyət və Turizm Nazirliyinin səlahiyyətində olduğu üçün ölkə başçısının imzaladığı sərəncam ikili tabeçiliyi aradan qaldıracaq".
Həmsöhbətimiz hesab edir ki, struktur və idarəçilik baxımından şəhər və rayonların turizm və mədəniyyət şöbələrinin birbaşa adıçəkilən quruma tabe olması düzgün qərardır: "Bu qərar turizmin inkişafına təsir göstərən amillərdən biridir". Günel CƏLİLOVA
