"Vəfa" Sosial İctimai Birliyinin təşkilatçılığı ilə növbəti xeyriyyə tədbiri keçirilib. Birlik bu dəfə Qarabağ qazisi, reper Bəhlul Tufan üçün xeyriyyə konserti təşkil edib.
Mərasim "Xanlar" restoranında baş tutub.
Məlumat üçün bildirək ki, Bəhlul Tufan Qarabağ döyüşlərində iştirak edib. Döyüş zamanı düşmən tərəfindən atılan güllələrdən biri B.Tufanın onurğa sümüyünə dəyib və nəticədə o, hərəkət qabiliyyətini itirib. Onun müalicəsi üçün "Vəfa" Sosial İctimai Birliyinin təşkilatçılığı ilə baş tutan xeyriyyə konserti Azərbaycan Himninin səsləndirilməsi ilə açıq elan olunub.
Birliyin təsisçisi Vəfa Əsədova tədbirdə iştirak edən hər kəsə təşəkkür edərək B.Tufanın müalicəsinə dəstək olmağa dəvət edib.
"Vəfa" Sosial İctimai Birliyin rəhbəri Fatimə Hacıbəyli isə çıxış edərək bildirib ki, o, B.Tufanın müalicəsi və istirahəti üçün Əmək və Əhalinin Sosial Müdafiəsi Nazirliyinə müraciət edib. Nazirlik Birliyin müraciətini müsbət qarşılayıb və B.Tufana 15 günlük göndəriş verilib.
Qeyd edək ki, xeyriyyə tədbirində QHT təmsilçiləri, media və tanınmış incəsənət nümayəndələri iştirak edib.
Günel CƏLİLOVA
