Rayon İcra Hakimiyyətindən aldığımız məlumata görə, bir qədər əvvəl Səbail RİH-də yaradılmış işçi qrup tərəfindən Badamdar qəsəbəsinin 3-cü yaşayış massivində torpaqların inventarlaşdırılması aparılıb.
Araşdırmalar zamanı müəyyən olunub ki, bu ərazidə tikilməkdə olan su anbarlarının birbaşa yaxınlığında hektarlarla sahə müxtəlif şəxslər, işbazlar, torpaq alverçiləri tərəfindən saxta sənədlər əsasında zəbt olunub, ərazi hasarlanıb, bir çox yerlərdə qanunsuz tikinti işləri aparılıb. İşçi qrupun apardığı araşdırmaların nəticəsi olaraq RİH tərəfindən burada zəbt olunaraq hasarlanmış torpaq sahələrinin hasarlarının sökülərək ərazinin ilkin vəiyyətə gətirilməsi prosesinə başlanıb.
Badamdar qəsəbə nümayəndəsi Zaur Əliyevin verdiyi məlumata görə, RİH tərəfindən bu işlərə texnika və işçi qüvvəsi cəlb olunub və bir neçə gün ərzində 3,4 ha ərazidəki hasarlar və qanunsuz tikililər sökülərək ərazi təmizlənib. Artıq 6 hektara yaxın yeni ərazidə qanunsuz zəbt olunmuş torpaq sahələrinin təmizlənərək dövlətə qaytarılması prosesinə başlanıb.
Araşdırmalar zamanı torpaq sahələrinin bəzi işbazlar və torpaq alverçiləri tərəfindən köhnə tarixlə hazırlanmış saxta sənədlər əsasında rəsmiləşdirilməsinə cəhdlər edildiyi müəyyən olunaraq, qanunsuz torpaq zəbti və tikinti işləri ilə bağlı materiallar və saxta sənədlər müvafiq tədbirlərin görülməsi məqsədilə Prokurorluq orqanlarına göndərilib.
RİH tərəfindən Badamdar ərazisində qanunsuz torpaq sahələrinin zəbti və tikintilərlə bağlı araşdırmalar və torpaq sahələrinin inventarlaşdırılması işləri daha qətiyyətlə davam etdirilir.
Xəbər xidməti
