Nicat Əliyev: "Ürək transplantasiyası əməliyyatına böyük bir kardioloji heyət cəlb olunmalıdır"
Yaxın zamanlarda Azərbaycanda ürək transplantasiyasının həyata keçirilməsi mümkün olacaq. Bu barədə Milli Məclisin Səhiyyə komitəsinin sədri Əhliman Əmiraslanov bildirib. O deyib ki, bu istiqamətdə işlər aparılır: "Azərbaycanda bu sahədə böyük işlər görülür. 15 il əvvəl Azərbaycanda insan orqan və toxumalarının transplantasiyası çox az şəkildə həyata keçirilirdi. Bu gün artıq ölkəmizdə qara ciyər, böyrək, müxtəlif insan toxumalarının, gözün müxtəlif hissələrinin transplantasiyası mümkündür".
Ürək transplantasiyasının Azərbaycanda da həyata keçiriləcəyi kardioloqlar tərəfindən xoş qarşılanır.
Hətta bir neçə ay əvvəl Milli Məclisin Səhiyyə komitəsinin üzvü Rəşad Mahmudov da bildirmişdi ki, bu gün Azərbaycanda ürək transplantasiyasının həyata keçirilməsi tamamilə mümkündür. O qeyd etmişdi ki, Azərbaycanda ürək transplantasiyasının bir neçə mərkəzdə aparılmasına heç bir texniki əngəl yoxdur: "Burada olan əsas əngəl bu gün cəmiyyətin sosial olaraq ürək transplantasiyasına hazır olmamasıdır. Bu gün ailədən və ya yaxınlardan biri həyatını itirdiyi zaman onun üzərində ekspertizanın aparılmasına qətiyyətlə qarşı çıxırıq. Əsas problem də elə budur. Bunun dindən, etnik dəyərlərdən gəlməsi müzakirə predmetidir. Dində belə bir əngəl yoxdur. Əgər belə əngəl olsaydı, İranda, Türkiyədə və digər ərəb ölkələrində bu cür əməliyyatlar aparılmazdı. Bu gün ölkədə insan orqanı gözləyən insanlar var. Hazırda ölkədə qara ciyər və böyrək köçürülməsi reallaşdırılır. Əməliyyatlar canlıdan-canlıya həyata keçirilir. Lakin ürəkdə bu mümkün deyil".
Ölkəmizdə reallaşdırılması gözlənilən ürək transplantasiyası barədə fikir bildirən kardioloq Nicat Əliyev "Bakı-Xəbər"ə açıqlamasında qeyd etdi ki, bunun həyata keçirilməsi müsbət addım olar. Kardioloq ümid edir ki, yaxın zamanlarda belə bir ağır və əhəmiyyətli orqan transplantasiyasına icazə veriləcək: "Ancaq ürək elə bir orqandır ki, buna donorun necə tapılacağı sual doğurur. Böyrək transplantasiyası zamanı sağlam insan böyrəyinin birini öz qohumuna verir. Ürək isə tək orqandır. Donorun necə və hansı meyarlarla seçiləcəyi bəlli olmalıdır. Yəqin ki, beyin ölümü keçirən şəxslərdən donor kimi istifadə olunacaq".
Həmsöhbətimiz onu da diqqətə çatdırdı ki, ürək transplantasiyası həyata keçirilərsə, bu işə böyük bir heyət cəlb olunacaq. Transplantasiya əməliyyatını bir kardioloq-cərrah və bir neçə assistent həyata keçirə bilməz. Bu işdə kardioloji heyət cəlb olunmalıdır.
Günel CƏLİLOVA
