Mais Ağayev: "Taksilərdə vahid qiymət tətbiq olunandan sonra fərdi taksi sürücüləri və sahibkarlar diqqəti xidmətin keyfiyyətinin artırılmasına yönəldəcək"
Bu gün ölkədə müxtəlif adda taksilər fəaliyyət göstərir. Fərdi taksilərlə yanaşı, müxtəlif şirkətlərin taksiləri də mövcuddur ki, onlar da sərnişinlərə xidmət edir. Ancaq taksilərin, demək olar ki, hər biri eyni istiqamətə müxtəlif qiymətə aparır.
Bəllidir ki, havalar soyuyan kimi taksilərdə qiymət artımı müşahidə olunur. Yəni əvvəlki günlərlə müqayisədə taksilər qiyməti daha da artırır.
Taksilərdə qiymət artımının qarşısını almaq məqsədilə standart qiymətin tətbiq olunması təklif olunur.
Taksi xidməti göstərən şəxsi avtomobillərdə qiymətlərin tənzimlənməsi ilə bağlı Tarif Şurasına müraciət olunacaq. Əsas səbəb fərdi taksilərdə xidmət müqabilində qiymətlərlə bağlı yaşanan xaosdur.
Taksilərdə standart qiymətin tətbiq olunması ilə bağlı Bakı Nəqliyyat Agentliyinin mövqeyini öyrəndik. Agentliyin İctimaiyyətlə əlaqələr şöbəsinin sektor müdiri Mais Ağayev "Bakı-Xəbər"ə açıqlamasında qeyd etdi ki, Agentliyin əsas məqsədi paytaxt ərazisində taksi kimi fəaliyyət göstərən avtonəqliyyat vasitələrinin fərqlənmə nişanı almasının təmin etməkdir: "Taksi xidmətinin təkmilləşdirilməsi ilə bağlı mərhələli şəkildə işlər həyata keçirilir. İlkin mərhələdə hazırda Bakı şəhərinin ərazisində fəaliyyət göstərən minik avtomobilləri fərqlənmə nişanı almalıdır. Bura fərdi şəkildə fəaliyyət göstərən taksilər, "UBER", "188" və digər taksi şirkətləri aiddir. Fərqlənmə nişanının alınması isə sadədir. Şəxs özünə VÖEN açdıqdan sonra sadələşdirilmiş vergi formasında 18 manat dövlət rüsumu ödəyir. Sürücü həmin ödənişi təsdiq edən qəbzi, sürücülük və şəxsiyyət vəsiqəsini Nəqliyyatı İntellektual İdarəetmə Mərkəzinin fərqlənmə şöbəsinə təqdim edir. Hazırda fərqlənmə nişanı almaq üçün müraciət edənlərin sayı artıb. 3000-dən yuxarı sürücü fərqlənmə nişanı almaq üçün müraciət edib. Onu da deyim ki, fərqlənmə nişanı bir aylıq müddətə verilir. Bakı şəhərində fəaliyyət göstərən taksilərin təxmini sayı 15-16 mindir. Fərqlənmə nişanı alan taksilərin sayı 7000 olarsa, o zaman biz ikinci mərhələyə keçə bilərik. İkinci mərhələ isə taksilərə taksometrin quraşdırılmasından ibarət olacaq. Taksilərə taksometr quraşdırılandan sonra vahid qiymət tətbiq oluna bilər".
Həmsöhbətimizin sözlərinə görə, sərnişinlərin rahatlığı üçün taksilərə taksometr quraşdarılmalıdır: "Bəzən elə hal olur ki, qısa məsafə üçün fərdi taksilər sərnişindən artıq məbləğ alır. Ancaq taksometr quraşdırılsa, sərnişin kilometrə görə ödəniş edər. Taksilərdə vahid qiymət tətbiq olunandan sonra fərdi taksi sürücüləri və sahibkarlar diqqəti xidmətin keyfiyyətinin artırılmasına yönəldəcək. Bu da, təbii ki, taksidən istifadə edənlərin rahatlığına səbəb olacaq".
Günel CƏLİLOVA
