Ənvər Fərəcov: "Sözügedən peşələrin xüsusiyyətindən irəli gələrək müəllim və polislər zaman-zaman gərgin anlar yaşayır"
Xəbər verildiyi kimi, polis və müəllimlərə psixoloji yardım göstərilməsi təklif edilir. Bu barədə təklif Milli Məclisin Səhiyyə komitəsinin iclasında "Psixoloji yardım haqqında" qanun layihəsinin müzakirəsi zamanı səsləndirilib.
Qeyd olunub ki, polislərə hər hansı cinayətkar dəstənin zərərsizləşdirilməsi ilə bağlı əməliyyatdan əvvəl və sonra mütləq psixoloji yardım göstərilməlidir.
Millət vəkilləri hesab edir ki, əməliyyat zamanı polislərdə bir sıra psixoloji problem yarana bilər, eləcə də əməliyyatda həmkarının yaralanması və ya həlak olması onların ciddi psixoloji sarsıntı keçirməsinə səbəb olur. Ona görə də belə əməliyyatdan öncə və sonra bu tip yardımlar vacib sayılır. Həmçinin fövqəladə hallar orqanlarında çalışan əməkdaşlara da psixoloji yardımın göstərilməsi məqsədəuyğun hesab edilib.
İclasda müəllimlərə də psixoloji yardım göstərilməsi və müəllimlərin işə götürülməzdən əvvəl psixoloji testdən keçməsi təklif olunub. Deputat Kamilə Əliyeva bunu bir sıra amillərlə əlaqələndirib: "Müəllimlərin özləri də psixoloji testlərdən keçməlidir. Mətbuatda rast gəlirik ki, şagirdlə müəllim arasında xoşagəlməz hallar olur. Bir neçə dəfə olub ki, şagirdlər döyülüb. Bu baxımdan müəllimlərin işə qəbul zamanı psixoloji testdən keçirilməsi yaxşı olardı".
Maraqlıdır, ekspertlərin sözügedən təklifə münasibəti necədir? Məsələyə münasibət bildirən ekspert Ənvər Fərəcovun sözlərinə görə, qanunda bunun öz əksini tapmasına ehtiyac var: "Çünki hər iki peşələr kifayət qədər çətin və məsuliyyətlidir. Eyni zamanda, sözügedən peşələrin xüsusiyyətindən irəli gələrək müəllim və polislər zaman-zaman gərgin anlar yaşayır. Belə olan halda, əlbəttə ki, onlara psixoloji yardımın göstərilməsi vacibdir. Çünki müşahidələr göstərir ki, əvvəlki illərlə müqayisədə indi müəllim işləmək daha çətindir. Həm indiki tədris proqramları çox ağırdır, həm də hazırkı məktəb şagirdləri dünyagörüşünə görə əvvəlkilərdən xeyli fərqlidir. Bu da, əlbəttə ki, müəllimlərin işini daha da çətinləşdirir. Yəni müəllimlər bu səbəbdən gərgin işləməli olur. Başqa bir tərəfdən, müasir informasiya, əyləncə vasitələri şagirdlərin dünyagörüşünə birbaşa təsir göstərdiyi üçün onları idarə etmək elə də asan olmur. Bir sıra hallarda şagird və müəllimlər arasında gərgin anlar yaşanır. Bu səbəbdən müəllimlərə psixoloji yardım göstərilməsinə ehtiyac var".
Vidadi ORDAHALLI
