Vaqif Qarayev: "O tip verilişlərdə özünü hər şeyin nicatı kimi qələmə verən, çox bəsit düşüncəli "həkimləri" də müşahidə edirəm"
Ölkədə yayımlanan telekanalların, demək olar ki, əksəriyyətində sağlamlıq verilişləri nümayiş olunur. Həmin verilişlərdə müxtəlif xəstəliklər haqqında məlumat verilir. Təbii ki, mövzu hansısa xəstəlik üzərində qurulubsa, o sahə üzrə həkimlər verilişə dəvət olunur.
Bildirilir ki, o tip verilişlərə dəvət olunan həkimlərin bir qismi öz işinin peşəkarı deyil. Onlar efir vasitəsilə özlərini reklam edərək tamaşaçılara yanlış məlumat verir. Hətta respublikanın baş kardioloqu Faiq Quliyev bu günlərdə media nümayəndələrinə açıqlamasında qeyd edib ki, müxtəlif növ xəstəliklərlə bağlı əhali düzgün məlumatlandırılmalıdır. Onun sözlərinə görə, Azərbaycanın müxtəlif televiziya kanallarındakı proqramlarda iştirak edən həkimlərə nəzarət olunmalıdır: "Amma bu gün müxtəlif televiziya proqramlarında həkimlər, hansısa mərkəzlər özünü reklam edir. Bu düzgün deyil. O reklama, proqramlara cəlb olunan həkimlərə görə kimsə məsuliyyət daşımalıdır. Onların doğrudan da sahəsi üzrə mütəxəssis olub-olmadığı müəyyənləşdirilməlidir. Bəzən proqramlarda kardioloqlar çıxış edir, amma bu sahənin mütəxəssisi kimi mən onları tanımıram.
Bu gün həkim işləmək istəyənlər müəyyən sertifikasiyadan keçir, sonradan 5 il ərzində fəaliyyət göstərmək üçün razılıq alır. Reklam olunan həkimin fəaliyyəti, işləmək icazəsinin olub-olmaması yoxlanılmalıdır".
Pediatr Vaqif Qarayev "Bakı-Xəbər"ə açıqlamasında qeyd etdi ki, bütün televiziya kanallarında sağlamlıq verilişləri var: "Həmin verilişin aparıcısı həkimdirsə, təbii ki, orada yalnız peşəkarlar çıxış edəcək. Yox, sağlamlıq verilişini tibbdən anlayışı olmayan bir şəxs apararsa, o zaman orada istənilən şəxsin çıxışını görmək olar. O tip verilişlərdə özünü hər şeyin nicatı kimi qələmə verən, çox bəsit düşüncəli "həkimləri" də müşahidə edirəm. Bu qətiyyən qəbulolunmazdır. Təbii ki, kanal bu verilişlər sayəsində pul qazanır, "həkim" də əlinə fürsət düşdüyü üçün özünü təbliğ edir".
Həmsöhbətimiz bildirdi ki, bir pediatr olaraq, analara sağlamlıq verilişlərinə baxmağı tövsiyə edir: "Amma veriliş boyu nə danışdığını özü belə anlamayan ekspert həkimə və aparıcıya baxmaq məsləhət deyil. Peşəkar göz peşəkarı seçə bilir. Bizim TV-lərdə peşəkarlıqdan başqa hər şey var".
Günel CƏLİLOVA
