"Təhsil Cəmiyyəti"nin təşkilatçılığı və "Akademi Group" Xaricdə Təhsil Mərkəzinin dəstəyilə Bakıda keçiriləcək Türkiyə universitetlərinin növbəti təhsil sərgisinin təşkilatçılıq işləri yekunlaşıb.
Bu bərədə redaksiyamıza məlumat verən "Akademi Group" Xaricdə Təhsil Mərkəzinin layihə rəhbəri Razi Vəliyev deyib:
- Oktyabrın 29 və 30-u tarixlərində saat 12:00-dan 17:00-dək Bakıda "Hilton" otelində təşkil olunan sərgidə Türkiyənin tanınmış dövlət və özəl universitetlərinin nümayəndələri sərgi iştirakçılarının təmsil etdikləri universitetlər və buradakı təhsillə bağlı bütün suallarını ətraflı cavablandıracaq. "Akademi Group" Xaricdə Təhsil Mərkəzi tərəfindən ənənəvi olaraq hər il təşkil olunan sərgidə bu dəfə də tələbələrə yüksək keyfiyyətli təhsil imkanı, yataqxanalar və digər məsələlər barədə ətraflı məlumat veriləcək, Türkiyə universitetlərində pulsuz təhsil imkanlarını açıqlayan təqdimatlar keçiriləcək. Maraqlananlar, həmçinin, tələbə yataqxanaları, buradakı sosal şərait və yaşam qaydaları haqqında da ətraflı məlumat ala biləcək. Əlavə olaraq, sərgi müddətində seminarların keçirilməsi də nəzərdə tutulur.
Sərgidə İstanbul Aydın, Bahçeşehir, İstanbul Kültür, Üsküdar Universiteti kimi Türkiyənin tanınmış universitetləri iştirak edəcək. Həmçinin Türkiyənin Bakıdakı səfirliyinin təhsil müşavirliyinin məsul nümayəndələrinin də iştirakı nəzərdə tutulur.
Xəbər xidməti
