Şəmsəddin Əliyev: "Qanunsuz mərc oyunlarının keçirilməsi ilə əlaqədar ibtidai istintaq aparmaq səlahiyyətinin polisə verilməsi müsbət effekt verəcək"
Xəbər verildiyi kimi, Azərbaycanda daxili işlər (polis) orqanlarına qanunsuz olaraq lotereyaların və idman mərc oyunlarının təşkili və ya keçirilməsi ilə əlaqədar cinayət işləri üzrə ibtidai istintaq aparmaq səlahiyyəti verilib.
Bu, Azərbaycan Prezidenti İlham Əliyevin imzaladığı "Azərbaycan Respublikası Cinayət-Prosessual Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə məsələləri haqqında" Qanunun və həmin qanunla təsdiq edilmiş Azərbaycan Respublikası Cinayət-Prosessual Məcəlləsinin tətbiq edilməsi barədə" Azərbaycan Prezidentinin 2000-ci il 25 avqust tarixli, 387 nömrəli Fərmanında dəyişikliklər edilməsi haqqında" Fərmanda əksini tapıb.
İndiyə qədər qanunsuz lotereyaların və idman mərc oyunlarının təşkili və ya keçirilməsi ilə əlaqədar cinayət işləri üzrə ibtidai istintaqı yalnız Vergilər Nazirliyi aparıb. Dəyişikliyə əsasən, bundan sonra qanunsuz lotereyaların və idman mərc oyunlarının təşkili və ya keçirilməsi ilə əlaqədar cinayət işləri üzrə ibtidai istintaqı Vergilər Nazirliyi və ya daxili işlər orqanları aparacaq.
Bütövlükdə bununla bağlı polisə səlahiyyət verilməsini ekspertlər necə dəyərləndirir? Bunun nə kimi müsbət effekti ola bilər?
Məsələyə münasibət bildirən "Polisə Dəstək" İctimai Birliyinin rəhbəri Şəmsəddin Əliyevin sözlərinə görə, polisə bununla bağlı səlahiyyətin verilməsi bu sahədə qanunsuz halların azalmasına müsbət təsir göstərəcək: "Məsələ ondadır ki, maddələri analiz etdikdə qeydiyyata alınmış cinayətlərin istintaqının 80 faizi DİN-in istintaq orqanları tərəfindən həyata keçirilir. Nəyə görə belədir? Əvvəla DİN-in yaranma tarixi bir əsrə yaxındır. Bunların istər əməliyyat-axtarış fəaliyyətinin, istərsə də istintaqın həyata keçirilməsi, baş vermiş hadisələrə çevik reaksiyası, isti izlərlə cinayətlərin açılması praktikası böyükdür. O cümlədən, istintaqın obyektiv həllini tapmaq istiqamətində səriştələri, peşəkarlıqları və təcrübələri böyükdür. Bu mənada hesab edirəm ki, qanunsuz mərc oyunlarının təşkili və ya keçirilməsi ilə əlaqədar ibtidai istintaq aparmaq səlahiyyətinin polisə verilməsi müsbət effekt verəcək. Bu kimi hallara qarşı daha çevik mübarizə aparılacaq. Çünki DİN-də kifayət qədər səriştəli istintaq işçiləri, buna nəzarət edən idarələr var. Fikrimcə, DİN-ə belə səlahiyyətin verilməsi təsadüfi deyil. Bu, sözügedən qurumun keçmişi və cinayətlərin hərtərəfli istintaqının, təhqiqatın aparılması ilə bağlıdır".
Vidadi ORDAHALLI
