Məhərrəm Zülfüqarlı: "Maddi təminat yaxşı olsa, kurikulumlara ehtiyac yaranmaz"
Azərbaycanın təhsil sistemi uzun illərdir ölkə ictimaiyyətində ciddi müzakirə obyekti olaraq qalır. Bu sahədə müxtəlif çatışmazlıqlar zaman-zaman müzakirə mövzusu olub. Son dövrlər orta məktəblərdə mövcud təhsil sisteminin müəyyən elementlərindən ciddi narazılıqlar özünü göstərməkdədir.
Bu sahədə ən ciddi problemlərdən biri də orta məktəblərdə monitorinq imtahanlarının keçirilməsi, valideyn komitələrinin fəaliyyəti və kurikulumlardır. Görünən odur ki, sözügedən məsələlərdən narazılıqlar daha çox özünü göstərir. Sadalanan üç məsələ təhsilin inkişafına yardımçı olmaq əvəzinə, əksinə, əlavə problemlər yaradır. Məsələn, əksər ölkə vətəndaşları belə hesab edir ki, valideyn komitələrinin işi yalnız pul yığmağdan ibarətdir. Yəni onların fəaliyyəti bundan o tərəfə keçmir və təhsil səviyyəsinə hansısa fayda vermir. Ümumilikdə sadalanan üç məsələnin təhsildə yaratdığı problemlərə ekspertlərin münasibəti necədir? Məsələyə münasibət bildirən təhsil eksperti Məhərrəm Zülfüqarlının sözlərinə görə, bütün bunlar bir sıra amillərdən qaynaqlanır: "İndiki dövrdə valideyn komitələrinin olmasına əsla ehtiyac yoxdur. Bu sanki sovet dönəmini xatırladır. İndiki dövrdə belə ictimai vəzifələrin olması ondan irəli gəlir ki, məktəb öz problemini həll edə bilmir. Başlayır valideynlərdən kömək diləməyə. Əlbəttə, valideyn-məktəb əlaqəsi vacibdir. Ancaq elə etmək lazımdır ki, məktəbin problemləri valideynin üzərinə düşməsin. Ancaq təəssüflər olsun ki, məktəblərdə uşaqlardan pul yığılır. Ona görə də islahatlar köklü olmalıdır. Məktəblərin maddi-texniki bazası yaxşılaşdırılmalı, müəllimlərin maaşı artırılmalıdır. Monitorinq imtahnlarının keçirilməsi elə də vacib deyil. Monitorinq qrupu getməmişdən əvvəl məktəbin maddi-texniki bazası yaradılmalıdır. Müəllimlərə normal əməkhaqqı verilməlidir. Maddi təminat yaxşı olsa, kurikulumlara ehtiyac yaranmaz. Bax, əsas problem bundadır. Müəllimin maaşı yaxşı olsa, əlavə yerlərdə dərs deməsinə ehtiyac olmaz. Nəticədə tədrisin keyfiyyəti möhkəmlənər. Ona görə də bu üç məsələ üzərində işləmək lazımdır. Yoxsa sözügedən sahələrdə mövcud narazılıqlar bundan sonra azalmaq əvəzinə, daha da artacaq".
Vidadi ORDAHALLI
