Adil Qeybulla: "İnsanların sağlamlığı üçün nəzərdə tutulan dərmandan biznes kimi istifadə etmək düzgün deyil"
"Azərbaycanda həkim resepti olmadan dərmanların geniş reklam olunmasının tərəfdarı deyiləm". Bunu Milli Məclisin Səhiyyə komitəsinin sədri Əhliman Əmiraslanov komitənin ötən gün keçirilən iclasında deyib.
Ə.Əmiraslanov bildirib ki, həkim resepti olmadan verilən dərmanların düzgün təyin edilmədən, doğru dozada müəyyən edilmədən qəbulu sonra ciddi fəsadlara gətirib çıxarır: "Bəzən kimsə reklamda dərmana baxır deyir ki, bu patoloji əlamətdən məndə də var. Bu dərmanı alıb qəbul edir. Amma sonra məlum olur ki, həmin dərman ona uyğun deyil və daha sonra xəstənin müalicəsi daha da çətinləşir".
Ekspertlər də dərmanların reklam olunmasının tərəfdarı deyil.
Professor, həkim-ekspert Adil Qeybulla bizimlə söhbətində qeyd etdi ki, dərman preparatlarının reklamı qadağan olunmalıdır: "Bəllidir ki, reklamın əsas mahiyyəti biznes xarakterlidir. İnsanların sağlamlığı üçün nəzərdə tutulan dərmandan biznes kimi istifadə etmək düzgün deyil".
Həmsöhbətimizin fikrincə, dərman yalnız həkim resepti əsasında satılmalıdır. Onun sözlərinə görə, Avropanın heç bir ölkəsində həkim resepti olmadan aptekdən dərman almaq mümkün deyil: "Ancaq bizdə isə vəziyyət fərqlidir. Sağlığında problemi olan insan rahat şəkildə əczəxanada işləyən satıcıya yaxınlaşıb ondan dərman istəyə bilər. Satıcı da resept olmadan xəstəyə hansısa dərmanı satır. Bu gün telekanallarda müxtəlif adda ağrıkəsici və ya digər preparatlar reklam olunur. Səhhətində müəyyən problemi olan insan reklamda gördüyü dərmanın onun dərdinə əlac olacağını düşünüb həmin preparatı alır. O dərmanı qəbul edən xəstənin səhhətində başqa problemlər yaranır. Hər bir dərman xəstəyə yazılmazdan öncə onun xəstənin orqanizminə düşüb-düşməməsi müəyyən olunmalıdır".
Ekspert onu da əlavə etdi ki, bu gün apteklərdə arıqlama, eyni tərkibdə olan antibiotik və digər dərman preparatları reseptsiz satılır: "Köklükdən əziyyət çəkənlər aptekdən hansısa arıqladıcı dərmanı alır. O dərmanlar insan səhhətinə olduqca ziyandır".
Günel CƏLİLOVA
