Adil Qeybulla: "Bu gün, demək olar ki, dünyada ürək-damar xəstəliklərinin xüsusi çəkisi artmaqdadır"
Son vaxtlar mətbuatdan, yaxın-uzaq tanışlardan tez-tez eşidirik ki, filankəs ürək çatışmazlığından əziyyət çəkir, müalicə olunur, kimlərsə ürək çatışmazlığından dünyasını dəyişib və s.
Açıqlanan rəsmi məlumatlar da təsdiq edir ki, son illər ürək-damar xəstəliklərindən əziyyət çəkənlərin sayı artıb.
Səhiyyə Nazirliyinin baş kardioloqu, professor Faiq Quliyev mətbuata açıqlamasında deyib ki, son 5 ildə ürək-damar xəstəsi kimi qeydiyyata düşənlərin sayı 2 dəfədən çox artıb. Bu xəstəliklərin qarşısını almaq üçün profilaktik və maarifləndirici tədbirlər lazımdır.
F.Quliyev qeyd edib ki, Azərbaycanda ürək-damar xəstəliklərinin yayılması Fransa, Portuqaliya, İtaliya, Almaniya kimi ölkələrdən daha çoxdur. Bu da kardio-profilaktikadan asılıdır. Həmin ölkələrin pəhrizləri, regionları fərqlidir.
Ürək-damar xəstəlikləri nə səbəbdən artır və bununla necə mübarizə aparmaq olar? Məsələ ilə bağlı professor, həkim-ekspert Adil Qeybullaya müraciət etdik. O bizimlə söhbətində bildirdi ki, bu xəstəliklərin artmasının əsas səbəbi insanların yaşam tərzi və qeyri-düzgün qidalanmasıdır: "Bu gün, demək olar ki, dünyada ürək-damar xəstəliklərinin xüsusi çəkisi artmaqdadır. Əslində, bunun səbəbləri məlumdur. İlk növbədə insanların həyatının ciddi olaraq avtomatlaşmasını əsas amil kimi qeyd etmək lazımdır. İnsanların az hərəkət etməsi, çox qida qəbul etməsi, xolestrollu qidaların rasionda üstünlük təşkil etməsi ürək-damar xəstəliklərinin artmasına gətirib çıxarır. Çünki orqanizmdə qəbul edilən kalori ilə sərf edilən kalori arasında bir balans olmalıdır. Bunların arasındakı tarazlıq pozulsa - çox qida qəbul edilib, az kalori sərf olunsa, orqanizmdə mübadilə pozulur. Mübadilənin pozulması ara məhsullarının oynaqlarda, damarlarda çökməsinə səbəb olur və nəticədə də orqanizm tədricən sıradan çıxır. Xolesterollu qidaların çox qəbul edilməsi onların damarlarda çökərək qan dövranı yollarını daraltmasına səbəb olur. Bu da orqanizmdə qan təchizatının pozulmasına gətirib çıxarır. Ürək damarlarının daralması daim işlək orqan olan ürəyin işlək mexanizmini pozur. Bu da, nəticə etibarilə, ürəyin ciddi əziyyət çəkməsinə səbəb olur".
Həmsöhbətimiz onu da əlavə etdi ki, paytaxt Bakıda ürək-damar xəstəliklərindən əziyyət çəkənlərin sayı daha çoxdur: "Bakı meqapolis olduğundan, burada insanlar streslə daha tez-tez qarşılaşdığından, bu, ürək-damar xəstəlikləri ilə nəticələnir. Amma rayonlarda insanlar təbiətlə daha çox əlaqədə olduğundan və digər amillərdən onlarda xəstəlik daha az qeydə alınır".
Professor bildirdi ki, cavan insanlarda ürək xəstəlikləri daha tez ölümə səbəb olur: "Yaşlı insanlar ikinci infarktı nisbətən yüngül keçirə bilir. Gənc xəstə isə birinci infarktdan vəfat edə bilər. Çünki onların orqanizmi bu prosesə hazır olmur. Gənclərdən fərqli olaraq yaşlı insanlarda ürəyi qidalandıran damarlar arasında əlaqələr işləyir. Bu damarların işləməsi üçün insanın müəyyən yaşa çatması lazımdır".
Günel CƏLİLOVA
