Fərqanə Mehmanqızı: "... uşaqların psixologiyası etibarlı əllərdə olacaq"
Xəbər verildiyi kimi, səhiyyə naziri Oqtay Şirəliyevin əmri ilə regionlarda uşaq poliklinikalarının nəzdində psixi sağlamlıq bölmələri yaradılıb. Səhiyyə Nazirliyinin məlumatına əsasən, bölmələrin yaradılmasında məqsəd psixi sağlamlıq xidmətlərinin əhali üçün əlçatanlığını təmin etməkdir.
Artıq Sumqayıt, Gəncə, Mingəçevir, Şəki, Lənkəran, Quba və Şirvan şəhərlərində psixi sağlamlıq bölmələri yaradılıb, müxtəlif ixtisaslı mütəxəssislər, o cümlədən həkim-psixiatrlar, psixoloqlar, loqopedlər, müalicəvi bədən tərbiyəsi və əmək terapiyası üzrə təlimatçılar treninqlərə cəlb olunub. Bundan başqa, Heydər Əliyev Fondunun dəstəyi ilə pilot layihə çərçivəsində 2016-cı ilin yaz aylarında Lənkəranda çalışan mütəxəssislər üçün ARSN-nin Psixi Sağlamlıq Mərkəzinin əməkdaşları tərəfindən treninq aparılıb.
Məsələ ilə bağlı fikir bildirən psixoloq Fərqanə Mehmanqızı "Bakı-Xəbər"ə açıqlamasında qeyd etdi ki, bu layihənin ölkə ictimaiyyətinə müsbət təsiri olacaq: "Uşaq poliklinikalarının nəzdində psixi sağlamlıq şöbələrinin yaradılması nəticəsində cəmiyyət uşaq psixologiyasının problemləri ilə tam tanış olacaq. Bu bölmələr sayəsində valideynlər uşaq psixologiyası barədə məlumatlı olacaq. Uşaqlarda yaranan travma və depressiyanın qarşısının alınmasına öz töhfəsini verəcək. Uşaq psixologiyası barədə məlumatlı olan valideyn övladına qarşı daha tədbirli davranacaq".
Həmsöhbətimizin sözlərinə görə, uşaq poliklinikalarının nəzdində psixi sağlamlıq bölmələrinin yaradılması ilə gələcəyimiz sayılan uşaqların psixologiyası etibarlı əllərdə olacaq: "Gələcək nəsil artıq daha sağlam ruhlu olacaq. Bu o deməkdir ki, gələcəkdə cinayət, vəziyyətdən sui-istifadə, özünə qəsd, aqressiv hərəkətlər kimi xoşagəlməz davranışlar azalacaq. Sadaladığım cinayətlərin arxasında onların uşaqlıqda yaşadığı travma dayanır".
F.Mehmanqızının sözlərinə görə, psixoloq nəzarəti altında olan uşaqların psixologiyasında mənfi düşüncəyə yer olmayacaq.
Günel CƏLİLOVA
