İbrahim Kərbalıyev: "Abonentə nəsə qaranlıq qalsa, o zaman o yazılı şəkildə müraciət edir"
Gəncə şəhər sakini Sevil Dəmirova "Bakı-Xəbər"ə müraciət ünvanlayıb. Müraciətin əsas məzmunu onlardan vaxtilə ölkə başçısı cənab İlham Əliyev tərəfindən bağışlanmış qazdan istifadəyə görə borcun tələb olunması ilə bağlıdır. Gəncə şəhəri, İ.Qayıbov küçəsi 123 ünvanında yaşayan S.Dəmirovanın ünvanladığı müraciətdə qeyd olunur: "2009-cu ildə evlərə SMART kart tipli sayğac qoyularkən, köhnə sayğacda olan borclar Prezident tərəfindən bağışlandı. Hətta borclu sakinlərə borc ödənildikdən sonra sayğac qoyulub. Həmin vaxtdan uzun müddət keçdikdən sonra əhalinin SMART kartından 80 faiz borc tutulur. Gəncə şəhər Qaz-İstismar İdarəsinə müraciət etdikdə isə bizə 2009-cu ildən guya borclarımızın olduğu bildirildi. Biz 80 faiz borclara tutulmasının səbəbinin araşdırılmasını xahiş edirik".
Müraciəti Mahirə Bayramova, Zülfiyyə Bayramova, Namiq Hacıyev, Oruc Qurbanov, Küşvarə Bayramova da imzalayıblar.
Belə görünür ki, cənab Prezidentin vaxtilə sildiyi borclar yenidən yığılır. Bəs həqiqət necədir?
Gəncə şəhəri İ.Qayıbov küçəsində yaşayan sakinlərin şikayətini aydınlaşdırmaq məqsədilə "Azəriqaz" ASC ilə əlaqə saxladıq. "Azəriqaz"ın İctimaiyyətlə əlaqələr şöbəsinin rəisi İbrahim Kərbalıyev "Bakı-Xəbər"ə açıqlamasında qeyd etdi ki, hər bir abonentin məlumat bazası olur: "Abonentin sərf etdiyi qazın dəyəri, onun köçürdüyü məbləğlər həmin bazada qeyd olunur. Prezident İlham Əliyev tərəfindən silinən borclar birmənalı olaraq silinib. Ancaq abonent işlətdiyi qazın dəyərini ödəməyib, borc yığılıbsa, bu başqa məsələdir. Abonent yaşadığı ərazinin Regional Qaz-İstismar İdarəsinin Abonent şöbəsinə yaxınlaşıb oradan abonent haqqında məlumat tələb edir. Abonentə nəsə qaranlıq qalsa, o zaman o yazılı şəkildə müraciət edir. Bütün kommunal xidmətlərdə olduğu kimi, "Azəriqaz" İB-nin işçi qrupu fəaliyyət göstərir. İşçi qrupu həmin müraciəti araşdırıb borcun nədən yarandığını, onun ödənilib-ödənilməməli olduğu barədə abonentə yazılı şəkildə cavab göndərir".
Redaksiya olaraq xatırladırıq ki, biz vətəndaşların "Azəriqaz"ın Gəncə şöbəsindən narazılığını ictimailəşdirmək funksiyamızı yerinə yetirdik. İşin qalanını araşdırmağı Gəncə idarəsindən gözləyirik.
Günel CƏLİLOVA
