Məhərrəm Zülfüqarlı: "Özəl təhsil müəssisələri də ola bilər"
Məlum olduğu kimi, Azərbaycanda məktəbəqədər təhsil müəssisələrinin özəlləşdirilməsi təklif edilir. Bu təkliflə Milli Məclisin Elm və təhsil komitəsinin iclasında "Məktəbəqədər təhsil haqqında" qanun layihəsinin müzakirəsi zamanı komitə sədri İsa Həbibbəyli çıxış edib.
Onun fikrincə, özəlləşmə məktəbəqədər təhsil müəssisələrinin təyinatını dəyişməməlidir: "Qanun layihəsinin hazırlıq variantında bağçaların özəlləşdirilməməsini qeyd etmişdik. Lakin sonra baxdıqda aydın olur ki, rayonların bəzilərində maliyyə yardımları ayırmaq bir az çətin olur. Ona görə də məcburən dövlətin tikib istifadəyə verdiyi bir çox bağçaların inkişaf etməsi və fəaliyyətini davam etdirməsi üçün özəlləşdirməyə ehtiyac var. Belə faktlar rayonlarda müşahidə olunur. Bu səbəbdən təyinatı dəyişmədən məktəbəqədər təhsil müəssisələrinin özəlləşdirilməsini mümkün hal hesab edirik".
Qanun layihəsi müzakirələrin yekununda Milli Məclisin plenar iclasına tövsiyə olunub.
Bu arada Təhsil Nazirliyi Milli Məclisdə "Məktəbəqədər təhsil haqqında" qanun layihəsində məktəbəqədər təhsil müəssisələrinin mülkiyyəti profili üzrə fəaliyyətini saxlamaq şərtilə özəlləşdirilməsi ilə bağlı səsləndirilən fikirlərə münasibət bildirib. Təhsil Nazirliyinin məktəbəqədər və ümumi təhsil şöbəsinin müdiri Aydın Əhmədov deyib ki, nazirlik məktəbəqədər təhsil müəssisələrinin özəlləşdirilməsinin tərəfdarı deyil. Şöbə müdiri vurğulayıb ki, mövcud məktəbəqədər təhsil müəssisələrinin şəbəkəsi onsuz da böyük deyil, ölkə üzrə əhatə olunma səviyyəsi 14 faiz təşkil edir: "Buna görə də mövcud müəssisələrin qorunub saxlanmasına ehtiyac var".
Maraqlıdır, bəs təhsil ekspertləri məsələyə necə yanaşır?
Məsələyə münasibət bildirən təhsil üzrə ekspert Kamran Əsədov bunun əleyhinədir: "Hesab edirəm ki, uşaq bağçaları özəlləşdirilsə, bu yanlış addımlardan biri olacaq. O sahə özəlləşdirilir ki, həmin sahə üzrə özəl sahə yoxdur. Bu gün istər Bakı şəhərində, istərsə də regionlarda kifayət qədər özəl təhsil müəssisəsi fəaliyyət göstərir. Özəl uşaq bağçalarına daha çox imkanlı valideynlərin uşaqları qəbul olunur. Reallıqla danışsaq, bu gün ən ucuz özəl bağçaların qiyməti 200 manatdan başlayır. Dövlət bağçalarını da özəlləşdirsək, bura cəlb olunan uşaqların sayı 15-20 faiz təşkil etməyəcək".
Digər təhsil eksperti Məhərrəm Zülfüqarlı isə məsələyə bir neçə prizmadan yanaşdı: "Bu cür təkliflər irəli sürülə bilər. Amma dövlət təhsil və məktəbəqədər təhsil müəssisələrinin özəlləşdirilməsi düzgün deyil. Özəl təhsil müəssisələri də ola bilər. Amma dövlət təhsil müəssisələri də mütləq olmalıdır. Əhalinin imkansız təbəqəsinin övladları üçün bərabər təhsil almaq imkanları yaradılmalıdır və buna ehtiyac var. Məktəbəqədər təhsil müəssisələrinin özəlləşdirilməsi bugünkü şəraitdə məqbul deyil. Ancaq sonra şərait yaranarsa, vəziyyət imkan verərsə, buna getmək olar". Vidadi ORDAHALLI
