Mətanət Əsgərqızı: "Şəhid ailələrinə verilən birdəfəlik müavinətin həcminin 10 dəfəyədək artırılması təklifi xoş qarşılanır"
Milli Məclisin ötən plenar iclasında şəhid ailələrinə verilən vəsaitin artırılması təklif edilib. Bu təkliflə millət vəkili Aydın Mirzəzadə çıxış edib. Deputat bildirib ki, şəhid ailələrinə ayrılan vəsaiti 10 dəfə artırmaq lazımdır: "Şəhid ailələri dövlətin diqqətindədir. Onlara verilən vəsait artırılmalıdır. Maliyyə Nazirliyi üzərinə düşən işi yerinə yetirməlidir".
Millət vəkili Adil Əliyev də təklifi dəstəkləyib. Deputat vəsaitin artırılmasının vacib olduğunu vurğulayıb.
Deputat Əflatun Amaşov da həmkarına dəstək verib. Onun sözlərinə görə, Azərbaycanda elə şirkət var ki, bir işçinin həyat sığortasına görə 100 min manat vəsait ödəyir: "Bizim torpaqlarımızın müdafiəsi uğrunda şəhid olan şəxslərin ailələrinə cəmi 11 min manat sığorta pulu ödənilir. Bu məbləğin artırılması şəhid ailələri üçün müsbət hal olardı".
Şəhid ailələrinə verilən vəsaitin artırılması təklifini tək millət vəkilləri deyil, eyni zamanda, vətəndaş cəmiyyəti nümayəndələri, sıravi şəxslər də dəstəkləyir. "Əsgər Ailələrinə Dəstək" İctimai Birliyinin rəhbəri Mətanət Əsgərqızı "Bakı-Xəbər"ə açıqlamasında qeyd etdi ki, şəhid ailələrinin sosial durumuna diqqət artırılmalıdır: "Heç kim deyə bilməz ki, şəhid ailələrinin sosial durumu normal səviyyədədir. Əksər şəhid ailələrinin bank və evsizlik problemi var. O ailələrin maddi sıxıntısı yetərincədir. Bəzi şəxslər elə düşünür ki, şəhid ailəsinin bank problemi varsa, bunun dövlətə nə aidiyyəti var? Amma bu düzgün fikir deyil. Şəhid yaşasaydı, bu gün onun ailəsi maddi sıxıntı içərisində olmazdı. Vətən uğrunda canını vermiş insanların ailələrinə yardım etmək hər birimizin borcudur. Bunu tək dövlətin üzərinə atmaq olmaz. İmkanı olan hər bir şəxs ehtiyac içində olan şəhid ailələrinə yardım etməlidir".
Həmsöhbətimiz onu da əlavə etdi ki, bəzi şəhid ailələri onlara göstərilən qayğı və diqqətdən istifadə edir: "Hansısa şəhid ailəsinin normal dolanışığı varsa və onun ev çətinliyi yoxdursa, o cür ailələrə birdəfəlik müavinət verilməsi düzgün olmaz. Bu məsələdə yük vətəndaş cəmiyyətinin üzərinə düşür. Onlar ehtiyac içərisində olan şəhid ailələrini tapıb koordinatlarını aidiyyəti qurumlara göndərməlidir ki, onlara dəstək olunsun".
M.Əsgərqızının sözlərinə görə, hazırda əsas diqqət aprel döyüşlərində həlak olan şəhid ailələrinədir: "Belə bir vəziyyətdə ötən dövr Qarabağ döyüşlərində həlak olan şəhidlər sanki unudulur. O şəhidlərin ailələrini də unutmaq lazım deyil. Həm aprel, həm də bundan əvvəl Qarabağ döyüşlərində şəhid olanların ailələrinə eyni gözlə baxmaq lazımdır".
Birlik sədri qeyd etdi ki, şəhid ailələrinə verilən birdəfəlik müavinətin həcminin 10 dəfəyədək artırılması təklifi xoş qarşılanır: "Zənnimcə, şəhid ailələri digər ailələrdən seçilməlidir. Yəni vətən uğrunda canını verənlərin ailələri başqa ailələrdən daha yaxşı yaşamalıdır. Onların heç bir sıxıntısı olmamalıdır".
Günel CƏLİLOVA
