Abil Bayramov: "Bütün bunlara inzibati qaydada nəzarət olunmasına ehtiyac var"
Azərbaycanda ödənişli uşaq bağçalarında maksimum qiymət həddinin müəyyən olunması təklif edilir. Belə ki, bu təkliflə Milli Məclisin Elm və təhsil komitəsinin sədri İsa Həbibbəyli çıxış edib. İ.Həbibbəyli bildirib ki, özəl uşaq bağçalarında ödənişi maksimum 500 manat həddində müəyyən etmək olar: "Müxtəlif ölkələrdə bu müxtəlif cür hesablanır. Bəzi ölkələrdə minimum əməkhaqqının misli ilə hesablanır. Azərbaycanda da bu həddi müəyyən etmək məqsədəuyğundur".
O qeyd edib ki, iclasda müzakirə olunan yeni hazırlanmış və ilk oxunuşda təqdim olunan "Məktəbəqədər təhsil haqqında" qanun layihəsinə bu məsələnin salınmasını təklif edir.
O da məlumdur ki, Bakıda dövlət bağçaları ilə yanaşı, çoxlu sayda özəl bağça da fəaliyyət göstərir. Uşaqlar üçün bütün rahatlıqları təmin edən özəl bağçaların aylıq ödənişi xidmət səviyyəsinə görə dəyişir. Xidmət və keyfiyyət baxımından dövlət bağçalarını üstələyən özəl müəssisələrin qiymətləri yetərincə yüksəkdir. Bu məsələ dəfələrlə gündəmə gətirilsə də, özəl uşaq bağçalarında qiymətlər ucuzlaşmaq bilmir.
Qeyd edək ki, 2013-cü ildə "Körpələr evlərinə, körpələr evi-uşaq bağçalarına, uşaq bağçalarına, xüsusi uşaq bağçalarına və uşaq evlərinə müddətli vergi güzəştlərinin verilməsi haqqında" Qanun qəbul olunub. Qanunda göstərilib ki, körpələr evləri - uşaq bağçaları, xüsusi uşaq bağçaları və uşaq evləri 2014-cü il yanvarın 1-dən başlayaraq 10 il müddətinə Vergilər Məcəlləsi ilə müəyyən edilmiş hüquqi şəxslərin mənfəət vergisini və sadələşdirilmiş vergini ödəməkdən azaddır. Bu müəssisələrin vergidən azad olunmasına baxmayaraq, özəl uşaq bağçalarında qiymətlər hələ də yüksəkdir. Bakıda elə özəl bağçalar var ki, qiyməti 500-1000 manat arasında dəyişir.
Bu baxımdan ödənişin maksimum 500 manat olması təklifini ekspertlər necə dəyərləndirir?
Məsələyə münasibət bildirən ekspert Abil Bayramovun sözlərinə görə, prinsipcə, qiyməti bazar tənzimləsə, yaxşı olar: "Bəlkə də bununla bağlı inzibati qaydada tənzimlənməyə ehtiyac yoxdur. Sadəcə, qiymətlərə deyil, keyfiyyət standartlarına inzibati nəzarət olsa, daha yaxşı olar. Keyfiyyət standartları deyərkən burada yaxşı qidalanma, uşaqların saxlanma şəraiti və digər məsələlər nəzərdə tutulur. Bütün bunlara inzibati qaydada nəzarət olunmasına ehtiyac var. Məsələ ondadır ki, bir sıra hallarda özəl bağçalarda qiymətlər orada təqdim olunan xidmət keyfiyyəti ilə uzlaşmır. Görürsən ki, qiymət çox yüksəkdir, amma uşaqlara göstərilən xidmətin keyfiyyəti bundan qat-qat aşağı səviyyədədir. Valideyn yüksək məbləğdə ödənişlər etsə də, uşağa lazımi xidmətin göstərilməsini görmür. Necə deyərlər, qiymətlər süni şəkildə şişirdilir. Hesab edirəm ki, bu kimi məsələlər qanunla tənzimlənməlidir".
Vidadi ORDAHALLI
