Etibar Əliyev: "Məktəbəqədər hazırlıqlarda keyfiyyət problemi mövcuddur"
"Yeni yaradılan məktəbə hazırlıq qruplarının gələcəkdə ödənişli olması ilə bağlı səsləndirilən fikirlər tamamilə yanlışdır". Bunu mətbuata açıqlamasında Bakı Şəhəri üzrə Təhsil İdarəsinin müdiri Məhəbbət Vəliyeva deyib.
Onun sözlərinə görə, bu gün Bakıda artıq 20400-ə yaxın uşaq məktəbə hazırlıq təlimlərinə cəlb olunub: "Qeyd edim ki, bu təlimlər Nazirlər Kabinetinin 16 iyun 2016-cı il tarixli, 272 nömrəli Qərarı əsasında təşkil olunub. Tamamilə ödənişsiz təlimlərdir. Növbəti illərdə təlimlərin miqyası bir az da genişlənəcək. Bir də qeyd etmək istərdim ki, bu gün Bakı məktəblərində təlimlərə cəlb olunan uşaqlar yalnız Bakıda daimi qeydiyyatda olanlar deyil, eyni zamanda qeydiyyatda olmayan uşaqlar da var. Düşünürəm ki, gələcəkdə bu da müəyyən qədər problemlər yaradacaq. Bu il biz hələ ki, bu problemin öhdəsindən gəlmişik. 260 məktəbdə təxminən 900-ə yaxın məktəbə hazırlıq qrupunda, qeyd etdiyim kimi, 20400 uşaq təlimlərə cəlb olunub".
Maraqlıdır, təhsil ekspertlərinin məktəbə hazırlıq qruplarına münasibəti necədir? Məsələyə münasibət bildirən Azərbaycan Təhsil Şurasının sədri Əjdər Ağayev buna müsbət prizmadan yanaşdığını bildirdi: "Hazırda məlum səbəblərdən bütün uşaqlar bağçaya gedə bilmir. Bu da müəyyən çətinliklər yaradır. Təhsil Nazirliyi bu qərarla bağçanın üzərinə düşən öhdəliyi də öz üzərinə götürüb. Təcrübə göstərir ki, məktəbə gələn altıyaşlıların yalnız 20 faizi I sinifdə təlim əməyinə tam hazır olur və proqram materiallarının öhdəsindən müvəffəqiyyətlə gələ bilir. Digər 80 faiz isə təlim materiallarını mənimsəməkdə çətinliklə üzləşir. Bunun əsas səbəbi məktəbəqədər təhsil müəssisələrinin sayının az olmasıdır. Uşaqlar hazırlıqsız olur. Sovet dönəmində də oxşar qayda var idi və 86-cı ilə qədər məktəbə gedənlər məcburi olaraq hazırlıq kursundan keçirdi. Sonra məktəb yaşı 6-ya endirildi və bu qayda yığışdırıldı. Qaydanın yenidən tətbiq olunması müsbət haldır, amma bu, icbari şəkildə həyata keçirilərsə, daha effektiv olar".
Digər təhsil eksperti Etibar Əliyev isə buna fərqli prizmadan yanaşır. Onun fikrincə, məktəbəqədər hazırlıqlarda keyfiyyət problemi mövcuddur: "Əsasən regionlarda uşaqların bağçaya cəlb edilməsi faizinin aşağı olması və şəhərlərdə də analoji halların yaşanması bu addımın gerçəkləşməsinə səbəb oldu. Düşünürəm ki, bu proqramlarda müəyyən identiklik olmalıdır. Məktəbdə keçirilən hazırlıqla, məktəbəqədər hazırlıq proqramlarının uyğunlaşdırılması zəruridir. Çünki burada fərqli yanaşmalardan, təhsil proqramlarından söhbət gedə bilməz. Bu gün çoxlu sayda məktəbəqədər təhsil müəssisəsində çalışmalı olan tərbiyəçilər, müəllimlər işsiz durumdadır. Onları mütləq təkmilləşdirmə kurslarına yollamaqla yenidən işlərə cəlb etmək olar. Məktəbəqədər hazırlıqlarda keyfiyyət problemi mövcuddur. Bunun da əsas səbəblərindən biri məhz bu müəssisələrdə çalışanların böyük hissəsinin kollec təhsilli olmasıdır. Bu bir qüsur kimi özünü ciddi şəkildə göstərir".
Vidadi ORDAHALLI
