Sahil Ağabəyli: "Maşın suyun ortasında söndükdə onun mühərrikinin bir çox detalı sıradan çıxır"
Bir neçə gün ərzində paytaxt ərazisinə yağan intensiv yağışlar yollarda nəqliyyatın hərəkətinə mane oldu. Hətta bəzi yollar çökəklik ərazidə olduğu üçün yağan yağış o istiqamətdə gölməçələr yaratdı. Belə olan halda, o ərazidən keçən maşınların bir qismi gölməçədə batdı.
Açıqlanan məlumatlara əsasən, dərin gölməçələrdə 109 ədəd maşın batıb. Yağış sularından yaranan gölməçələrdə batan minik vasitələri xilasedicilər tərəfindən çıxarılıb. Ancaq bir neçə saat suyun içərisində qalan nəqliyyat vasitələrində müəyyən nasazlıqlar yaranıb. Bunu maşın ustaları və avtomobil sahibləri də etiraf edir. Avtomobil ustaları bildirir ki, belə maşınların təmiri böyük xərc tələb edir. Maraqlıdır, belə olan vəziyyətdə avtomobil sahiblərinə sığorta ödənişi verilə bilərmi?
Avtomobil ustası Sahil Ağabəylinin sözlərinə görə, maşın suyun ortasında söndükdə onun mühərrikinin bir çox detalı sıradan çıxır: "Avtomobilin içinə su dolduqda elektron sistem yanır ki, bu da xərci bir neçə dəfə artırır. Avtomobilin ilindən və markasından asılı olaraq, bu xərc 1000 manatla 10 000 manat arasında dəyişir. Lüks avtomobillərdə bu qiymət daha da arta bilir. Amma sürücülər bəzi nüanslara fikir verməklə xərci azalda bilər. Sürücülər belə dərin gölməçələrdən keçməyə məcbur olursa, bu zaman hava filtrini çıxara bilər ki, belə olduqda dərinliyi 1-1,5 m. olan sulardan rahatlıqla keçmək olur".
Sığorta sahəsi üzrə ekspert Xəyal Məmmədxanlı "Bakı-Xəbər"ə açıqlamasında qeyd etdi ki, yağan yağışdan yaranan gölməçələrdə batan maşınlara dəymiş zərər sığorta şirkətləri tərəfindən təmin oluna bilər: "Avtomobillərə dəymiş zərər təbii fəlakət nəticəsində baş verməyib. Yağan yağış təbii fəlakət hesab oluna bilməz. Sadəcə mövsümə uyğun olaraq yağış yağıb. Payız fəsli yağışına görə digər mövsümlərdən seçilir".
Həmsöhbətimizin sözlərinə görə, sığorta şirkətləri avtomobillərə dəyən zərərə görə sığorta məbləğini ödəyəndən sonra bu vəziyyətin yaranmasına cavabdeh olan qurumlara qarşı reqres qaydasında iddia qaldıra bilər: "Sığorta şirkəti ödədiyi məbləği aidiyyəti qurumlardan geri almaq ixtiyarına malikdir". Günel CƏLİLOVA
