Eyyub Hüseynov: "Tütünün tərkibində 5 minə kimi kimyəvi birləşmə var"
Gənclərin siqaret çəkmək kimi zərərli vərdişləri arasında sulu qəlyan da var. Qəlyan siqaretdən zərərsiz görünsə də, əslində 1 qəlyan 50 siqaretə bərabərdir. Bu zərərli vərdişin qarşısını almaq məqsədilə ölkədə sulu qəlyanların da istifadəsinin məhdudlaşdırılması nəzərdə tutulub.
Bəlli olduğu kimi, artıq Azərbaycanda "Tütün istehlakının məhdudlaşdırılması haqqında" qanun lahiyəsi artıq hazırdır.
Milli Məclisin Əmək və sosial siyasət komitəsinin üzvü Musa Quliyev media nümayəndələrinə açıqlamasında deyib ki, qanun layihəsi MM-in Əmək və sosial siyasət komitəsi tərəfindən hazırlanıb: "Yaxın vaxtlarda komitə bu qanun layihəsini müzakirəyə çıxaracaq. Bu ilin sonuna qədər Milli Məclisin plenar iclasına tövsiyə olunması gözlənir".
M.Quliyev qeyd edib ki, qanun layihəsində tütün məmulatlarının istehlakı ilə yanaşı, sulu qəlyanların da istifadəsinin məhdudlaşdırılması nəzərdə tutulub.
Azad İstehlakçılar Birliyinin (AİB) sədri Eyyub Hüseynov "Bakı-Xəbər"ə açıqlamasında qeyd etdi ki, sulu qəlyanın istifadəsinin məhdudlaşdırılması düzgün qərardır: "Məlumat üçün bildirim ki, ölkə başçısı İlham Əliyev tərəfindən Azərbaycan Respublikasında qeyri-infeksion xəstəliklərə qarşı strategiya təsdiq olunub. Həmin strategiyanı Səhiyyə Nazirliyi həyata keçirir. Strategiyada qeyd olunur ki, yaxın 5 il ərzində ölkədə siqaret istifadəçilərinin sayı 10 faiz azaldılmalıdır".
Həmsöhbətimiz təklif edir ki, sulu qəlyanların istifadəsinin məhdudlaşdırılması siyahısına elektron siqaretlər də daxil edilsin: "Sulu qəlyanın da başqa siqaretlər kimi insan orqanizminə ziyanı böyükdür. Çox təəssüf ki, Azərbaycanda sulu qəlyanla yanaşı, elektron siqaretlər də irəliləyir. Məsələ çox vacibdir. Hətta təklif edilsin ki, elektron siqaretlə, sulu qəlyanın satışı dayandırılsın, Azərbaycandan çıxarılsın. 2001-ci ildə istehsalı qadağan olunan "Karvan" və "Şəki" siqaretlərinin "Azəri" firması tərəfindən istehsalı bərpa olunur. Bu siqaretlərə aidiyyəti qurumlar tərəfindən gigiyenik sertifikat verilir. Mən sizə deyim ki, adlarını çəkdiyim siqaretlərin tərkibində təhlükəli komponentlər var. Məsələ ilə bağlı dövlət qurumları qarşısında məsələ qaldırmışıq. Bu siqaretlərin satış qiyməti 40 qəpikdir. Bu qiymətə olan siqaretləri daha çox məktəblilər alır".
E.Hüseynov bildirdi ki, sulu qəlyanın buxarı vasitəsilə insanlar daha təhlükəli xəstəliyə tutulur: "Tütün məhsulları çox xəstəliklərə yol açır. Ən təhlükəlisi isə ağ ciyər xərçəngidir. Tütünün tərkibində 5 minə kimi kimyəvi birləşmə var. O birləşmələr məlum olan və olmayan çoxsaylı xəstəlik yaradır".
Günel CƏLİLOVA
