Paytaxtın Nəsimi rayonunun bir qrup sakini yaşadığı əraziyə qazın verilməməsi ilə bağlı ötən gün redaksiyamıza müraciət edib.
Şikayətçi Asudə Cəlilova qəzetimizə açıqlamasında qeyd edib ki, Şamil Əzizbəyov küçəsi 153 ünvanında yaşayır və artıq bir həftədir yaşadığı əraziyə qaz verilmir: "Bizim yaşadığımız ərazidə 30 nəfərə yaxın ailə yaşayır. O ailələrin içərisində uşaqlısı, yaşlısı olanı var. Evdə körpə uşaqlar var, yemək bişirə, çay qaynada bilmirik. Hələ yuyunmaqdan heç danışmıram".
A.Cəlilova bildirib ki, o və digər sakinlər "Azəriqaz"ın "qaynar xətt"inə müraciət edib. Onlara qazın nə səbəbdən kəsilməsi ilə bağlı heç bir cavab verilməyib.
Adıçəkilən ünvana qazın verilişinin nə səbəbdən dayandırılmasını öyrənmək məqsədilə "Azəriqaz" İB-nin İctimaiyyətlə əlaqələr şöbəsi ilə əlaqə saxladıq. Qurumdan bizə verilən məlumata görə, həmin ünvana qazın verilməməsi səbəbləri araşdırılıb və məsələ tezliklə həll olunacaq.
GÜNEL
