Dağıstan Tibb Akademiyasının nümayəndə heyəti Azərbaycan Tibb Universitetində (ATU) olub və ali məktəbin rəhbər heyəti ilə görüşüb. Görüş zamanı ATU-nun rektoru professor Gəray Gəraybəyli universitetin beynəlxalq əlaqələrindən söz salaraq, bir çox ali təhsil müəssisələri ilə əməkdaşlıq edildiyini bildirib. Qeyd olunub ki, təkcə Türkiyənin 16 universiteti ilə əməkdaşlığa dair qarşılıqlı müqavilələr imzalanıb.
Rektor G.Gəraybəyli bildirib ki, beynəlxalq əlaqələrin möhkəmləndirilməsi fərqli təhsil sistemləri ilə tanışlıq, yeniliklərin tətbiqi və nəticədə tədrisin təkmilləşdirilməsinə yardım olur. Çünki müasir dövrdə adi mühazirə oxuyan müəllim tələbələri maraqlandıra bilmir, onlara daha çox praktiki bilgilərin verilməsi lazımdır. Bu səbəbdən ATU-da tədris sistemində daim islahatlar aparılır, fəaliyyət daha da təkmilləşdirilir.
ATU-da təhsil sistemi haqqında məlumat verən professor G.Gəraybəyli qeyd edib ki, artıq 5 ildir ikipilləli təhsil sistemi tətbiq olunur. Rezidentura pilləsini bitirən məzunlar mütəxəssis həkim sayılır. Onlardan bəziləri elə ATU-nun klinikalarında işləyir. Bir çoxları isə xarici ölkələrdə staj keçir.
ATU-nun rektoru həmçinin vurğulayıb ki, beynəlxalq münasibətlər zamanı dil amili mühüm rol oynayır. Bu baxımdan, Dağıstan Dövlət Tibb Akademiyası ilə əməkdaşlıq bizim üçün daha rahat olacaq. Digər tərəfdən, Azərbaycanın Dağıstanla həmsərhəd olması da əlaqələri asanlaşdıran amillərdən biridir.
Dağıstan Dövlət Tibb Akademiyasının rektoru professor Süleyman Mammayev əvvəlcə Azərbaycan xalqını Müstəqillik Günü münasibətilə təbrik edərək ölkəmiz haqqında düşüncələrini açıqlayıb. Onun sözlərinə görə, son illər Azərbaycanda hər bir sahədə nəzərəçarpacaq dərəcədə müsbət dəyişikliklər baş verib. Bu islahatlar özünü təhsil və səhiyyə sistemində də göstərir.
Rəhbərlik etdiyi müəssisə haqqında məlumat verən S.Mammayev Dağıstan Dövlət Tibb Akademiyasında 6 minə yaxın tələbənin təhsil aldığını bildirib. O, Akademiyada mövcud tədris sisteminin ATU-dakına bənzədiyini də bildirib. Universitetin klinikalarını və xüsusilə də Anatomiya muzeyini bəyəndiklərini bildirən qonaq qarşılıqlı tələbə mübadiləsindən yararlanmaq istədiklərini deyib.
Görüşün sonunda ATU və Dağıstan Dövlət Tibb Akademiyası arasında əməkdaşlığa dair müqavilə imzalanıb.
Sonda professor G.Gəraybəyli həmkarını "ATU-nun qızıl medalı" ilə təltif edib. Rektor S.Mammayev tərəfindən də professor G.Gəraybəyliyə xatirə hədiyyəsi təqdim olunub.
Nümayəndə heyəti ilə görüşdə Rusiyanın Azərbaycandakı konsulu Sergey Klyuşev, konsulun ikinci katibi Alla Naniyeva, Dağıstan Dövlət Tibb Akademiyasının beynəlxalq əlaqələr şöbəsinin koordinatoru, Dağıstan Respublikasının əməkdar həkimi Albert Alimetov, ATU rektorunun müşaviri Zülfüqar Musabəyov, elmi işlər üzrə prorektor Rauf Bəylərov, beynəlxalq əlaqələr üzrə prorektor Rəhimə Qabulova, beynəlxalq əlaqələr şöbəsinin müdiri Nadir Zeynalov iştirak edib.
Xəbər xidməti
