Vasif Mirzəyev: "Əvvəlki illərə baxanda məhkəmə hakimlərindən şikayətlər azalıb"
Məhkəmə-Hüquq Şurasının növbəti iclası keçirilib. İclasda çıxış edən Şuranın sədri, ədliyyə naziri Fikrət Məmmədov ötən ay yüksək demokratik standartlar səviyyəsində keçirilmiş referendumun ölkəmizin gələcək inkişafı, insan hüquqlarının daha etibarlı təminatı, dövlət idarəçiliyinin təkmilləşdirilməsi baxımından mühüm əhəmiyyətini qeyd edib.
Konstitusiyaya dəyişikliklər haqqında Referendum Aktının böyük vətəndaş həmrəyliyi ilə qəbul edilməsinin dövlət başçısına olan yüksək inam və ümumxalq etimadının növbəti təzahürü olduğu xüsusi vurğulanıb. Qeyd edilib ki, Konstitusiyaya dəyişikliklər məhkəmə hakimiyyətinin fəaliyyətinə də müsbət töhfə verəcək, o cümlədən hakimliyə namizədlərə dair yaş həddinin götürülməsi gənclərin məhkəmə hakimiyyətində daha geniş təmsil olunmasına şərait yaradacaq.
Bununla yanaşı, iclasda hakimlər barədə intizam icraatlarına baxılaraq, kobud qanun pozuntularına və korrupsiyaya şərait yaradan hallara yol verdiklərinə görə Bakı şəhəri Yasamal Rayon Məhkəməsinin hakimi Aqşin Əfəndiyevin tutduğu vəzifədən azad olunaraq başqa işə keçirilməsi, Sumqayıt Şəhər Məhkəməsinin hakimi İlyas Mahmudova və Zaqatala Rayon Məhkəməsinin hakimi Arif İsmayılova töhmət verilməsi barədə qərarlar qəbul edilib. Bundan başqa, vətəndaşların haqlı narazılığına səbəb olan ciddi nöqsanlara, o cümlədən süründürməçilik hallarına yol verdiyinə görə bir hakim barədə intizam icraatı başlanıb.
Maraqlıdır, Məhkəmə-Hüquq Şurasının son iclasında qəbul olunan qərarlara münasibət necədir?
Məsələyə münasibət bildirən hüquqşünas Vasif Mirzəyev Məhkəmə-Hüquq Şurasının qəbul etdiyi qərarlara müsbət prizmadan yanaşdı: "Məsələ ondadır ki, MHŞ zaman-zaman keçirdiyi iclaslarda neqativ hallara yol verən hakimlər barəsində ölçü götürüb. Şuranın son iclasında qəbul olunan qararlar da bunun bir tərkib hissəsidir. Nəzərə almaq lazımdır ki, bu istiqamətdə görülən tədbirlər praktiki olaraq öz müsbət effektini verməkdədir. Çünki əvvəlki illərə baxanda məhkəmə hakimlərindən şikayətlər azalıb. Ötən müddət ərzində yol verdiyi nöqsanlara görə bir neçə hakim işdən azad edilib. Hətta ciddi pozuntuya yol verdiyinə görə həbs edilən də var. Hesab edirəm ki, bu kimi məsələlərlə bağlı MHŞ-nin tədbirlər görməsi və bir sıra qərarlar qəbul etməsi öz səmərəsini verəcək. Görülən işlər ölkədə müstəqil məhkəmə sisteminin daha da möhkəmlənməsinə xidmət edir. Belə ki, hüquqi dövlətin əsas sütunlarından biri məhz müstəqil məhkəmə sistemidir".
Vidadi ORDAHALLI
