Fatimə Hacıbəyli: "Narkoman qadınların əksəriyyəti "kruq"larının sayəsində bu bəlanın qurbanına çevrilir"
Heç vaxt! Heç bircə dəfə də! Bu, narkotikə aludə olan şəxslərin əvvəl və sonrakı fotolarına baxandan sonra insanın ağlına gələn ilk fikirdir. Narkomanların narkotikdən istifadə etməzdən əvvəl və sonra çəkdirdikləri fotolarda onların sifətlərində və bədənlərində olan dəyişikliyi istənilən şəxs müşahidə edə bilər.
XXI əsrin bəlası sayılan narkomaniya günü-gündən "çiçəklənir" və bütövlükdə dünyanı təhdid edir. Hər bir dövlət istər ayrılıqda, istərsə də birgə əməkdaşlıq çərçivəsində bu bəladan qurtulmağın yollarını axtarır. "Ağ ölüm" bəlası Azərbaycanda da yaşanır.
Azərbaycanda narkomaniya bəlasına düçar olmuş qadınların sayı kişilərə nisbətən az olsa da, onların sayı ildən-ilə artır.
Qadın və narkotik sözü uyğun olmasa da, təəssüf ki, ölkədə narkoman qadınların sayı heç də az deyil.
Açıqlanan statistik rəqəmlərə əsasən, ötən ilin sonuna qədər Səhiyyə Nazirliyinin Narkoloji Mərkəzində 2855 nəfər qeydiyyatda olub. Məlumatda qeyd edilib ki, onlardan 23.153 nəfəri dispanser, 5.402 nəfəri profilaktik qeydiyyatda olanlardır. Həmin şəxslərdən 592 nəfəri qadın, 158 nəfəri toksikoman, 20.036 nəfəri (437 nəfər qadın) inyeksion narkotik istifadəçiləridir. 2015-ci ildə 2.017 nəfər yeni qeydiyyata götürülüb, 2.118 nəfər isə qeydiyyatdan çıxarılıb.
Qadınların narkotikə qurşanmasının səbəbləri nədir? Onları bu bəladan necə qorumaq olar? Mövzu ilə bağlı ekspertə müraciət etdik.
"Vəfa" Sosial İctimai Birliyinin sədri Fatimə Hacıbəyli "Bakı-Xəbər"ə açıqlamasında qeyd etdi ki, qadınlar bilmədən narkotik istifadəçisinə çevrilir: "Bəzi qadınlar dost-tanışı ilə birlikdə hansısa məkanda əyləşir. Onlardan bəzisi çay evində qəlyan çəkir, bəzisi isə narkotik istifadəçisi olur. Həmin qadın narkotik istifadəçisi olan dostlarının təsiri ilə narkotik qəbul edir. Bir dəfə istifadədən, əlbəttə ki, heç kəs narkomana çevrilmir. Həmin "kruq"a bir də düşür və 2-3 dəfədən sonra onda alışqanlıq yaranır. Sonra isə, özü istəməsə belə, hər gün mütəmadi olaraq həmin şəxslərlə görüşüb narkotik qəbul etmək istəyəcək. Yəni narkoman qadınların əksəriyyəti "kruq"larının sayəsində bu bəlanın qurbanına çevrilir.
Həmsöhbətimizin sözlərinə görə, elə qadın var ki, ailə qurduqdan sonra ərinin narkoman olduğundan xəbər tutur və ərinin təkidi ilə narkotik qəbul edir: "Bu cür cütlüklərdən dünyaya gələn uşaqlar sağlam olmur. Onlarda hər hansı bir problem olur".
Birlik sədri bildirdi ki, qadınlar daha həssas olur: "Onlar tez əsəbləşir və sinirlərinə hakim ola bilmir. O qadınların ətrafında olan narkotik istifadəçiləri qadının sakitləşməsi və problemlərini unutması üçün narkotik təklif edir. Beləliklə, qadın narkotik istifadəçisinə çevrilir".
F.Hacıbəyli onu da əlavə etdi ki, narkotik istifadəçilərinin bəzisi heç qeydiyyata düşməyib: "Onların qeydiyyata düşməməsinin səbəbi isə ailəsidir. Onların doğmaları elə düşünür ki, övladı narkoman kimi rəsmi qeydiyyata götürülsə, el-oba arasında bu xəbər yayılar və ailə imicinə zərər gələr".
Günel CƏLİLOVA
