Nadir İsrafilov: "Peşə təhsili haqqında qanun hazırlanıb qəbul olunarsa, bu yalnız təhsilin xeyrinə deyil, eyni zamanda ölkənin də inkişafına səbəb olar"
Yaxın aylarda "İlk peşə təhsili haqqında" və "Orta ümumtəhsil məktəbləri haqqında" qanun layihələrinin hazırlanmasına başlanacaq. Bu barədə Milli Məclisin Elm və təhsil komitəsinin sədri İsa Həbibbəyli məlumat verib.
O bildirib ki, müstəqillik illərindən bu yana "Məktəbəqədər təhsil haqqında" qanun Azərbaycanda ilk dəfə olaraq qəbul olunacaq: "Müstəqillik illərində Azərbaycanda məkətəbəqədər hazırlıqla bağlı qanun olmayıb. Biz bu yeni qanunun hazırlanmasına işçi qrup yaradaraq, 1 il bundan qabaq başlamışıq. "Məktəbəqədər təhsil haqqında" qanun layihəsini hazırlayarkən dünya təcrübəsini əsas götürüb və Azərbaycanın mövcud reallıqlarını da nəzərə almışıq".
Hazırlanması nəzərdə tutulan peşə təhsili haqqında qanun layihəsinə nələrin daxil olunacağını öyrənmək məqsədilə təhsil eksperti Nadir İsrafilova müraciət etdik. Ekspert "Bakı-Xəbər"ə açıqlamasında qeyd etdi ki, o və digər təhsil ekspertləri təhsillə bağlı hazırlanan qanun layihələri barədə zaman-zaman mətbuat vasitəsilə öz fikirlərini bildirir: "Səsləndirdiyimiz təkliflərin bəzisi nəzərə alınır, bir qismi isə yox. Biz bu qanunun qəbulunu uzun müddətdir gözləyirik. Ümid edirik ki, parlamentin payız sessiyası müddətində peşə təhsili haqqında qanun qəbul olunacaq".
Həmsöhbətimizin sözlərinə görə, təhsilin önəmli sahələrindən biri də peşə təhsilidir: "Texniki peşə təhsili məsələsinə sovet dönəmində böyük diqqət yetirilirdi. Sonra 90-cı illərdə, müstəqillik əldə edildikdən sonra keçid dövrü ilə bağlı müəyyən boşluqlar əmələ gəldi, bununla peşə təhsili sisteminə, bir növ, diqqət azaldı. Bəzi texniki peşə təhsili məktəblərinin maddi-texniki bazası, binaları hərraca qoyuldu, bəziləri, əsas oldu-olmadı, peşə liseylərinə çevrildi və s. Ümumiyyətlə, bu sahəyə diqqət azaldı".
N.İsrafilovun sözlərinə görə, peşə yönümünə diqqət zəiflədikdən sonra bu sahəyə maraq da azaldı. Amma sonra məlum oldu ki, peşə sisteminin inkişafı vacibdir: "Azərbaycanda Avropa Oyunları keçiriləndə təhsil naziri etiraf etdi ki, gələn qonaqlara xidmət göstərmək üçün peşə ixtisasına yiyələnən işçilər tapa bilmirik. Bu cür problemlərlə üzləşdik. Prezident gənclərlə görüşündə də peşə təhsili sisteminə xüsusi diqqətin artırılması məsələsi ilə bağlı geniş çıxış edib".
Ekspertin fikrincə, gənclərin peşə təhsilinə marağının artırılması istiqamətində də işlər görülməlidir. Bunun üçün isə əsas iş maarifləndirmənin aparılmasıdır: "Almaniya, Yaponiya kimi ölkələr peşə ixtisası ilə dünyanın inkişaf etmiş ölkələrinə çevrilib. Bizdə mentalitet belədir ki, əsas ali təhsildir".
N.İsrafilov hesab edir ki, peşə təhsili haqqında qanun hazırlanıb qəbul olunarsa, bu yalnız təhsilin xeyrinə deyil, eyni zamanda ölkənin də inkişafına səbəb olar: "Peşə təhsilinin inkişafı ilə bağlı həm ölkə başçısı İlham Əliyevin və təhsil nazirinin diqqətəlayiq fikirləri var".
Günel CƏLİLOVA
