Rafiq Əliyev: "Erkən qış rejiminə keçid birbaşa Bakı Şəhər İcra Hakimiyyətinin qərarı ilə mümkündür"
Oktyabrın 16-dan etibarən ölkə ərazisində qeyri-sabit hava şəraiti davam edir. Paytaxt və bəzi rayonlarda intensiv yağış yağır. Bir sıra dağlıq və dağətəyi rayonlara isə sulu qar yağır. Qubaya isə qar yağıb. Havaların kəskin soyuması insanları vaxtından tez istilik sıxıntısına saldı.
Temperaturun kəskin aşağı düşməsi paytaxtda vətəndaşları indidən istilik sistemlərini qoşmağa vadar edib. Evlərində kombi sistemi olanlar bunu etsə də, mərkəzi istilik sisteminə qoşulu olan mənzillərdə yaşayanlar müxtəlif çıxış yolu axtarır.
Paytaxtın bəzi ərazilərində yaşayan insanlar qazın təzyiqinin mövcud havaya uyğun olmadığını bildirərək bunun artırılmasını istəyir.
Məlumdur ki, ölkə qış rejiminə noyabrın 15-də keçir. Bu tarixdən sonra qazın təzyiqi artırılır və mənzillərdə isitmə sistemi də işə salınır.
Havaların birdən-birə kəskin dəyişməsi erkən qış rejiminə keçilməsi üçün əsas sayıla bilərmi?
"Azəriqaz" İB-nin İctimaiyyətlə əlaqələr şöbəsinin rəisi İbrahim Kərbalıyev "Bakı-Xəbər"ə açıqlamasında qeyd etdi ki, havaların soyuması nəticəsində əhalinin təbii qaza tələbatı artır. Bu səbəbdən də bəzi ərazilərdə qazın verilişində çatışmazlıq yaranıb: "Amma hazırda bizim əsas məqsədimiz istehlakçılara təbii qazın çatdırılmasıdır ki, əhali heç bir problem yaşamasın. Oktyabrın 15-də respublika üzrə 9 milyon 961 min kubmetr təbii qazın verilişi təmin olunub. Oktyabrın 16-da isə bu rəqəm 11 milyon 154 min olub. Aradakı fərq 1 milyon 193 min kubmetrdir ki, artıq təbii qazın verilişi tərəfimizdən təmin olunub".
İ.Kərbalıyevin sözlərinə görə, bu gün qazın verilişi ilə bağlı hər hansı bir məhdudiyyət yaşanarsa, "Azəriqaz"ın çağrı mərkəzlərinə müraciət olunduqda həmin məlumatlar elektron qaydada sahələrə ötürülür. Əməkdaşlar tərəfindən qaz xətlərində tənzimlə işləri aparılır: "Artıq bir çox ərazilərdə təbii qazın verilişi bərpa olunub. Yaxın müddət ərzində də hansısa ərazidən məlumat daxil olarsa, orada da tənzimləmə işləri aparılacaq".
Həmsöhbətimiz xüsusi olaraq vurğuladı ki, digər kommunal qurumlardan fərqli olaraq, təbii qazın verilişində texniki təhlükəsizlik normaları xüsusi diqqətdə saxlanır ki, bu səbəbdən şəbəkəni birdən-birə təbii qazla doldurmaq mümkün olmur: "Bəllidir ki, 1 gün ərzində tələbat kəskin artıb və biz həmin tələbata uyğun təbii qaz verilişini həyata keçirmişik. Gələcəkdə havaların qarlı, şaxtalı keçdiyi dönəmdə də tərəfimizdən bu kimi tədbirlər davam etdiriləcək ki, əhali təbii qazın verilməsi ilə bağlı heç bir problem yaşamasın. Qaz sistemində yay və qış rejimi yoxdur. Ümumiyyətlə, təmsil etdiyim qurumda qış, ya da yay rejiminə keçid məsələsi yoxdur. Əhali tələbata uyğun təbii qazla təmin olunmalıdır və olunur".
"Azəristiliktəchizat" Açıq Səhmdar Cəmiyyətinin abonent və müştəri xidmətlərinin rəisi Rafiq Əliyev bildirdi ki, erkən qış rejiminə keçid birbaşa Bakı Şəhər İcra Hakimiyyətinin qərarı ilə mümkündür: "Bu qərar təkcə "Azəristiliktəchizat"a yox, eyni zamanda, "Azəriqaz" və "Azərişığ"a da şamil edilir".
Günel CƏLİLOVA
