Rafiq İsmayıl: "Yəni müəllim düşünür ki, məktəbdə şagirdə dərsi mükəmməl səviyyədə başa salarsa..."
"Bu gün ölkənin neft sənayesində ən böyük problem təhsil müəssisələrində kimya fənninin tədrisi ilə bağlıdır". Bunu Azərbaycan Milli Elmlər Akademiyasının Neft-Kimya Prosesləri İnstitutunun direktoru Vaqif Abbasov bildirib.
V.Abbasov deyib ki, bir çox məktəblərdə kimya fənninin tədrisindən imtina edilir. Onun sözlərinə görə, bu problemlərin həlli üçün kimya müəllimlərinin hazırlanması qaydaları (metodologiyası) dəyişməlidir: "10-cu sinfin 138 səhifəlik "Kimya" kitabını müəllimlər öyrədə bilmirsə, onun əsas səbəbi müəllim hazırlığı ilə bağlıdır. Ona görə müəllimlərin hazırlanması qaydaları dəyişməlidir".
Orta məktəblərdə kimya fənni nə səbəbdən zəif tədris olunur? Məsələ ilə bağlı ekspertə müraciət etdik.
Təhsil eksperti Rafiq İsmayıl bizimlə söhbətində qeyd etdi ki, məktəblərdə istənilən fənnin zəif tədris olunmasının səbəbi müəllimlərin bu işə həvəssiz yanaşmasıdır: "Müəllim dərsi necə gəldi izah edəndə şagird də o dərsə soyuq yanaşacaq. Yəni proses qarşılıqlı olaraq davam edir. Şagirdlərin, demək olar ki, böyük əksəriyyətinin oxumağa həvəsi yoxdur. Beləliklə, şagirdlər arasında savadsızlıq yaranır. Yenə deyirəm, bu hal təkcə kimya fənnində deyil, ədəbiyyat, riyaziyyat, fizika və digər dərslərdə də yaşanır".
Həmsöhbətimiz onu da əlavə etdi ki, kimya və digər fənnlərin zəif tədris olunmasının səbəblərindən biri də bəzi müəllimlərin öz işinə maddi maraq nöqteyi-nəzərindən yanaşmasıdır: "Yəni müəllim düşünür ki, məktəbdə şagirdə dərsi mükəmməl səviyyədə başa salarsa, o, əlavə repetitor yanına getməyəcək. Əlavə hazırlıq istəyindən irəli gələrək müəllimlər dərs zamanı tədris etdiyi fənni yüngülvari izah edir".
R.İsmayılın sözlərinə görə, 10-cu sinifdə kimya fənninin zəif tədris olunması müəllimlərin hazırlıqsızlığı ilə əlaqələndirilir: "Məncə bu yanlış fikirdir. Bütün müəllimlər tədris etdiyi fənnin məzmunundan xəbərdardır. Sadəcə müəllimlərdə əvvəlki həvəs yoxdur".
Günel CƏLİLOVA
