Fərqanə Mehmanqızı: "Məktəb psixoloqları işinin öhdəsindən layiqincə gəlsə, yeniyetmələr arasında bu qədər intihar halları yaşanmaz"
Son günlər mətbuat səhifələrində intihar halları haqqında informasiyalar, demək olar ki, hər gün yazılır. Burada ən dəhşətli hal intihar edənlərin arasında yeniyetmələrin olmasıdır. Məktəblilərin intihar etməsinin səbəbi müxtəlifdir. Onların təhsil aldığı orta məktəblərdə psixoloqun olmaması və ya şagirdlərlə maraqlanmaması da belə faciələrin baş verməsinə gətirib çıxarır.
Hətta valideynlər övladını məktəb psixoloqunun qəbuluna aparmaqda çətinlik çəkdiyini bildirir. Belə ki, bunu psixoloqun ya dekretdə, ya da məşğul olması ilə izah edirlər. Təbii ki, belə vəziyyətdə stress içində olan məktəblinin durumu daha da ağırlaşır. Məktəblərdə çalışan psixoloqların sayı artırıla bilərmi? Məktəb psixoloqları tələbatı ödəyə bilirmi?
Suallarımıza cavab tapmaq məqsədilə psixoloq Fərqanə Mehmanqızına müraciət etdik. O, "Bakı-Xəbər"ə açıqlamasında qeyd etdi ki, təhsil ocaqlarında psixoloqun olmaması təhsilə mənfi təsir göstərən başlıca amillərdən biridir: "Təhsil psixoloqu tək məktəblərdə deyil, eyni zamanda bağçalarda da olmalıdır. Uşaqlar körpəlikdən psixoloq nəzarətində olsa, bunun müsbət nəticələri olar. Bəllidir ki, bu gün ailələrdə müxtəlif səbəblərdən gərginlik yaşanır. Bu kimi mənfi tendensiyalar uşaq psixologiyasına mənfi təsir göstərir".
Həmsöhbətimiz təəssüf hissilə qeyd etdi ki, bu gün məktəblərdə çalışan psixoloqlar məktəblilərə hər hansı bir səbəblə bağlı psixoloji rəy vermir: "Bir valideyn kimi mən də uşaqlarıma məktəb psixoloqu tərəfindən rəy verildiyini görməmişəm. Heç olmasa uşaqlar üç ildən bir psixoanaliz olunmalıdır. Bu analiz normal, travmasız uşaqlarda 3 ildən bir aparılmalıdır. Həmin analiz nəticəsində uşaqlara diaqnoz qoyularaq ona uyğun terapiya olunmalıdır. Xüsusilə də 6-7 yaşlı uşaqlar mütəmadi olaraq məktəb psixoloqunun nəzarətində olmalıdır. Ancaq məktəblərdə bu yerinə yetirilmir. Məktəb psixoloqları isə uşaqların sayının çox, özünün isə tək olduğunu bildirir. Əslində onlar haqlıdır. Nəzərə almaq lazımdır ki, bir məktəbdə ən azı 2000 məktəbli təhsil alır. Belə olan halda, məktəbdə əlavə psixoloq ştatı açılmalıdır".
Ekspertin fikrincə, məktəb psixoloqu işinin öhdəsindən layiqincə gəlsə, yeniyetmələr arasında bu qədər intihar halları yaşanmaz.
F.Mehmanqızı onu da əlavə etdi ki, özəl təhsil ocaqlarında çalışan psixoloqlar üzərinə düşən işin öhdəsindən layiqincə gəlir: "Ümid edirəm ki, bu vəziyyət dövlət təhsil ocaqlarında da yaranacaq".
Günel CƏLİLOVA
