Rafiq İsmayıl: "Şəhid ailələrinə dəstək olmaq üçün magistr təhsili alan övladlarının təhsil haqqından azad olunması müsbət addımdır"
Azərbaycanda şəhid ailələrinin üzvləri orta ixtisas təhsil müəssisələrində (kollec) və Milli Elmlər Akademiyasının magistratura pilləsində təhsil haqqından azad olunub. Bu məsələ Milli Məclisin plenar iclasında müzakirəyə çıxarılan "Şəhid adının əbədiləşdirilməsi və şəhid ailələrinə edilən güzəştlər haqqında" Qanuna dəyişiklikdə əksinin tapıb.
Layihə barədə Milli Məclisin Əmək və sosial siyasət komitəsinin sədri Hadı Rəcəbli məlumat verib. Layihəyə əsasən, dövlət ali təhsil müəssisəsi ilə yanaşı, orta ixtisas təhsili müəssisələrində və müvafiq icra hakimiyyəti orqanının müəyyən etdiyi elmi təşkilatda ödənişli formada təhsil alan şəhid ailəsi üzvləri təhsil haqqını ödəməkdən azad olunur. Layihə səsverməyə çıxarılaraq qəbul edilib.
Şəhid ailələrinin övladlarının magistr təhsili üçün təhsil haqqından azad olunması ictimaiyyət tərəfindən müsbət qarşılanır.
Sosioloq Aytəkin Kamranqızı bizimlə söhbətində bildirdi ki, şəhid ailələrinə müxtəlif məsələlərlə bağlı yardım etmək müsbət addımdır: "Magistr təhsili alan şəhid ailələrinin övladlarının təhsil haqqından azad olunması təqdirəlayiqdir. Bu, Azərbaycan elminə müsbət töhfə verəcək. Elə ailələr var ki, onların maddi durumu övladlarının magistr təhsili alıb elmi işlə məşğul olmasına imkan vermir. Yaxşı olar ki, şəhid ailələrinin övladları tək magistr deyil, eyni zamanda bakalavr təhsil haqqından da azad olunsun. Belə bir təklif irəli sürülsə və qəbul olunsa, inanın ki, nə qədər savadlı gəncimiz yetişər".
Təhsil eksperti Rafiq İsmayıl bizimlə söhbətində bildirdi ki, şəhid ailələri əksər hallarda dövlət imtiyazlarından yararlana bilmir: "Əksər şəhid ailələri çoxuşaqlı olur. O ailələrin övladları nəinki magistr, heç bakalavr təhsili ala bilmir. Şəhid ailələrinə dəstək olmaq üçün magistr təhsili alan övladlarının təhsil haqqından azad olunması müsbət addımdır".
Günel CƏLİLOVA
