Mehriban Zeynalova: "Xaricilər şüurlu şəkildə ailə qurmağa üstünlük verir"
Açıqlanan statistik rəqəmlərə əsasən, son illər əcnəbilərlə qurulan nigahlar artıb. İndi azərbaycanlı qızların rus, ingilis, gürcü, hətta qaradərili insanlarla izdivaca girməsinə rast gəlinir.
Rəsmi məlumatlara görə, ötən il Azərbaycan vətəndaşları ilə əcnəbi şəxslər arasında 2680 nikah bağlanıb. 2014-cü ildə isə Azərbaycan vətəndaşları ilə əcnəbilər və vətəndaşlığı olmayan şəxslərdən 1816-sı nikah masasına əyləşib. 2013-cü ildə bu rəqəm 2 780, 2012-ci ildə 2688 olub. Bu ilin yeddi ayı ərzində 1171 azərbaycanlı xarici ölkə vətəndaşı ilə nikaha daxil olub. 2016-cı ilin 7 ayı ərzində Ədliyyə Nazirliyinin rayon, şəhər qeydiyyat şöbələri tərəfindən ölkədə 35,4 min nikaha daxilolma halları qeydə alınıb. Onlardan 624-ü Azərbaycan vətəndaşı olan qadınlarla xarici ölkə vətəndaşı olan kişilər arasında, 547-si isə Azərbaycan vətəndaşı olan kişilərlə xarici ölkə vətəndaşı olan qadınlar arasında bağlanan nikahlardır. Azərbaycan vətəndaşları ilə nikaha daxil olan xarici ölkə vətəndaşları əsasən Rusiya, Gürcüstan, Türkiyə və Ukrayna vətəndaşlarıdır. Ailə, Qadın və Uşaq Problemləri üzrə Dövlət Komitəsinin İnformasiya və analitik araşdırmalar şöbəsinin məlumatına görə, hər il əcnəbilərlə nikaha daxil olanların sayı 2600-2700 arasında dəyişir. Azərbaycanda ötən il ərzində ölkə vətəndaşları ilə əcnəbi şəxslər arasında bağlanan nikahlardan 149-u pozulub.
O da bildirilir ki, əcnəbilərlə qurulan nikahlar daha sağlam olur. Bu nikahlarda boşanma sayı yerli vətəndaşlarla müqayisədə xeyli azdır.
Millət vəkili Musa Quliyev hesab edir ki, əcnəbilərlə qurulan nikahlar Azərbaycanda demoqrafik təhlükə həddinə çatmayıb: "Ailə institutumuzun, mental dəyərlərimizin qorunub saxlanması imkan verir ki, azərbaycanlı qızlar müsəlman xalqları ilə nikaha daxil olsun. Hətta statistik rəqəmlərə də nəzər salsaq görərik ki, azərbaycanlı qızların əcnəbi və vətəndaşlığı olmayanlarla izdivacında əsas yeri türklər tutur. Bizim qızlar nadir hallarda rus, ingilis, gürcü, qaradərili xalqların nümayəndələri ilə evlənir. Amma təbii ki, genefondumuzun qorunması üçün əcnəbilərlə bağlanan nikahların sayı artmamalıdır. Ümumiyyətlə buna mane olmaq, tam qarşısını almaq isə mümkün deyil. Çünki ölkələrarası gediş-gəlişin artdığı, kommunikasiya texnologiyalarının sürətlə inkişaf etdiyi və qloballaşmanın vüsət aldığı bir dövrdə qarışıq nikahların artması tendensiyası bütün dünyada müşahidə olunur. Azərbaycanda bu statistikanın böyüməsini əngəlləyən amillər isə mental və ailə dəyərlərimizin qorunub saxlanmasıdır".
Millət vəkilinin sözlərinə görə, əcnəbi ilə evlənən qızlar çalışmalıdır ki, milli adət-ənənələrimizi unutmasın. Onların birgə nikahından dünyaya gələn uşaqlarda milli ruh itməsin: "Bizim adət-ənənələrimiz, bayramlarımız, bayramlarda icra olunan ayinlərimiz qorunub saxlansın və gələcək nəslə ötürülsün. Bunun üçün həmin ailələrdə bu dəyərləri yaşatmaq lazımdır".
"Təmiz Dünya" İctimai Birliyinin rəhbəri Mehriban Zeynalova qeyd etdi ki, əcnəbilərlə qurulan nikahların sağlam olmasının səbəbi onların intellektual səviyyəsinin yüksək olmasıdır: "Qonşu Türkiyədə rəsmi nikaha daha çox üstünlük verilir. Kimsə türk vətəndaşı ilə evlənir və boşanırsa, bunun səbəbi ailə münasibətlərində problem olması ilə izah olunur. Avropa vətəndaşları ilə ailə qurulanda əsasən əmlak məsələləri və nikah müqaviləsi tələb olunur".
Həmsöhbətimiz hesab edir ki, əcnəbi vətəndaşlarla ailə quranlar daha çox həmin ölkələrdə yaşayan və təhsil alan qızlardır: "Öz düşüncə tərzinə uyğun biri ilə nikah bağlananda o ailə sağlam olur. Xaricilər şüurlu şəkildə ailə qurmağa üstünlük verir".
Günel CƏLİLOVA
