Adil Qeybulla: "Bu cür aksiyaların keçirilməsi ölkə əhalisinin sağlamlığı üçün vacibdir"
Səhiyyə Nazirliyinin və Qafqaz Müsəlmanları İdarəsinin təşkilatçılığı ilə hər il Aşura günü qana ehtiyacı olan xəstələrə yardım məqsədilə könüllü qanvermə aksiyaları keçirilir. Məlumat üçün bildirək ki, bu il qanvermə aksiyaları Bakı şəhərinin 9, regionların isə 6 məscidində keçirilib. Əvvəlki illərdən fərqli olaraq bu il Quba və Şirvan Qan bankı bölmələrində də könüllü aksiyalar təşkil olunub.
"Mir-Mövsüm ağa", "Təzə pir", "Bibi-Heybət", "Cümə", "Qaraçuxur", " Hacı Soltan-Əli" Keşlə qəsəbə məscidləri, Hacı Əjdər məscidi, Nardaran məscidi, Sumqayıt şəhər Cümə məscidi, Mingəçevir şəhər Heydər məscidi, Şəki şəhər məscidi, Gəncə şəhər İmamzadə məscidi, Bərdə şəhər Cümə məscidi, Lənkəran şəhər Böyükbazar məscidi, MQB-nin Şirvan və Quba bölməsi, Elmi-Tədqiqat Hematologiya və Transfiziologiya İnstitutunda qanvermə aksiyaları keçirilib.
Aşura günü qanvermə aksiyasında 4141 nəfər könüllü olaraq qan verib və nəticədə 1863,3 litr qan tədarük olunub.
Tədarük olunan qandan hansı xəstəliklərdə istifadə oluna bilər? Bunun ölkəmiz üçün nə kimi faydaları var?
Suallarımızı həkim-ekspert, professor Adil Qeybulla cavablandırdı. O, "Bakı-Xəbər"ə açıqlamasında qeyd etdi ki, Aşura və digər günlərdə tədarük olunan qan ehtiyatı müxtəlif xəstəliklərdən əziyyət çəkənlərə köçürülür: "Harada götürülməsindən asılı olmayaraq, qan sonra yoxlanılır. İlk növbədə qanda hansısa virusun olub-olmaması yoxlanılır. Ola bilər ki, insan bir aydır QİÇS və digər keçici xəstəliklərə yoluxub, onun qanı yoluxucudur. Yoxlama zamanı həmin şəxsin qanı neqativ göstərəcək. Çünki orqanizmin həmin mikrobu tanıması və onu qəbul etməsi üçün üç ay vaxt lazımdır. Hansısa virusa yoluxmuş insanın qanında xəstəlik 3 aydan sonra aşkar olunur".
Həmsöhbətimizin sözlərinə görə, müxtəlif mərasimlərdə tədarük olunan qan ehtiyacı olan insanlara köçürülür: "Tədarük olunan qan və qandan hazırlanan preparatlardan hemofiliya və talassemiyalı, həmçinin, qana ehtiyacı olan bütün xəstələrin müalicəsində istifadə olunur".
A.Qeybulla qeyd etdi ki, qan ehtiyatı tükənə bilən olduğuna görə hər zaman donorların təmənnasız qan donorluğuna cəlb olunması mühüm amildir: "Artıq neçə ildir respublikamızda talassemiya və eləcə də irsi qan xəstəliklərindən əziyyət çəkənlər üçün qanvermə aksiyaları keçirilir və ölkə ictimaiyyəti bu xeyriyyə aksiyalarında fəal iştirak edir. Hər il Aşura mərasimlərində Qafqaz Müsəlmanları İdarəsinin təşəbbüsü ilə ölkə üzrə məscid və ibadətgahlarda qanvermə aksiyaları təşkil olunur. Eyni zamanda Səhiyyə Nazirliyi və digər dövlət qurumları tərəfindən vaxtaşırı könüllü qanvermə aksiyaları təşkil edilir. Bu cür aksiyaların keçirilməsi ölkə əhalisinin sağlamlığı üçün vacibdir".
Günel CƏLİLOVA
